Dala Junta: muciadus, acordanza sön les strotöres d‘acoliënza
Inteja Provinzia – Comuns por cherié te n cört tëmp strotöres temporanees por i muciadus tles zones te chëres che al ne é gnü tut sö ciamó degügn muciadus.
La situaziun por les porsones che fej domanda por asil y che röia adalerch dales spones talianes é ciamó problematica sön döt le teritore dla Talia y che á ince conseguënzes sön le sistem de acoliënza tl Südtirol. Ala Provinzia ti vëgnel assegné indöt 0,9 porcënt di muciadus presënc sön le teritore provinzial. Te n’incuntada inier da sëra á le presidënt Arno Kompatscher, l’assessuria por le setur sozial Martha Stocker y le presidënt dl Consorz di Comuns, Andreas Schatzer, incunté a Balsan i presidënc dles Comunités raionales y i ombolc de chi Comuns che ne á ciamó nia azeté muciadus. Atualmënter él te Südtirol 27 strotöres che, sön la basa de n’inteja danter Provinzia y Comissariat dl Govern, ospitëia zirca 1.500 muciadus che á damané do asil. La Provinzia se fistidiëia por garantí na destribuziun di muciadus sön döt le teritore te na manira valia, pian ia dal’acordanza arjunta danter Comuns y Comunités raionales sön na cuota de 3,5 porsones por vigni 1.000 abitanc.
Destribuziun valia söl teritore
Nia dötes les aministraziuns s’á impegné da tigní ite chësta acordanza y insciö él zirca le 50 porcënt di 1.630 muciadus che damana asil presënc tl Südtirol che vëgn ospitá a Balsan. Indöt él preodü por Südtirol 1.940 muciadus aladô dl sistem nazional. Na pert dles zones á respognü te na manira adatada, cun d’atres zones che ne á tut sö degun muciadú che damana do asil. Por avalié la situaziun gnarál atué döes mosöres: da na pert dessel gní metü a desposiziun strotöres ajuntives y dal’atra pert dessel gní cherié la poscibilité por i Comuns, singuls o en colaboraziun cun d’atri, da tó pert al sistem de proteziun SPRAR. Le problem de chësta poscibilité, tl vers de chëra 50 aministraziuns comunales á bele dé süa aprovaziun (cun 30 che podess le fá tosc), é che ara sará operativa dal 2018 inant.
Soluziun por intant olache al ne é degöna acoliënza
Tratan l’incuntada da inier él gnü sotligné l’esigënza da scomencé, cun le sostëgn dla Provinzia, a soluziuns por inant dan l’ativaziun dl sistem SPRAR y al é gnü tut la dezijiun che i posć messará gní metüs a desposiziun ti raiuns che cina sëgn á tut sö le manco muciadus, cun na priorité ai Comuns plü gragn. I raiuns de Naturns, dla Val Passiria, dl Ahrntal y dla Val Badia por ejëmpl ne á ciamó tut sö degun muciadú. La medema situaziun reverda ince na seria de Comuns cun plü de 5mile abitanc sciöche por ejëmpl Kaltern, Sarnthein, Sterzing, Neumarkt y Latsch. Por chëstes stortöres temporanees de acoliënza, che gnará finanziades dala Provinzia, sarál poscibl da adoré les strotöres preodüdes por l’adejiun al program SPRAR. Detais plü avisa gnará stlaris adöm cun i presidënc dles Comunités raionales y dales aministraziuns comunales.
Plü solidarieté danter i Comuns
Le presidënt Arno Kompatscher á ajunté che “la solidarieté danter i Comuns tla chestiun di muciadus mëss gní ampliada”, y che por le fá gnarál ince planifiché mecanisms che reverda le finanziamënt da adoré sciöche stromënt de presciun. “Chi che se para dal’acoliënza di muciadus che damana do asil o che á n comportamënt massa passif – á comenté le Landeshauptmann – ti fej n dann a atri Comuns che colaborëia y che mëss insciö tó sö n numer plü alt de porsones. Chësc comportamënt ne pó nia gní sostigní dala Provinzia.” En conclujiun á le presidënt Kompatscher y l’assessuria Stocker sotligné da na pert la nezescité da adoré mosöres de contenimënt di flusc de migranc tl vers dla Talia, y dal’atra pert da adaté le sistem d’asil ala realté globala nöia. “Cina che al ne sará nia novités te chësc contest – insciö Kompatscher y Stocker – sarál compit dla Provinzia y di Comuns da atué les acordanzes y da organisé le miú che ara vá l’acoliënza y l’integraziun di migranc assegná dal sistem de spartiziun nazional.”
USP
Galaria dales fotografies
