Dala Junta: aprové le program 2017 de ABD
La Junta provinziala á aprové le program 2017 de ABD Airport Spa che garantësc la gestiun dl aeroport de Balsan sciöche scrit dant dales prescriziuns.
L’operaziun de sciazada dles cuotes dla Provinzia por la venüda dla gestiun dl aeroport da Baslan jará tosc a piz, á anunzié le presidënt Arno Kompatscher do la sentada dla Junta provinziala. Mo cina ala sortida dla Provinzia da ABD Airport Spa, la sozieté de gestiun dl aeroport de Balsan, mëssel gní garantí le funzionamënt dl aeroport aladô dles normatives statales. Insciö él la Junta provinziala che á aprové de conseguënza le program anual 2017 dla sozieté ABD. Le program é gnü svilupé aladô di criters de sparagn y prevëiga les spëises nezesciares por la manutenziun y i intervënc d’adatamënt, por ci che reverda ince la zertificaziun dl regolamënt UE 139/2014. Le program prevëiga implü cosć standard sciöche les spëises por le personal. La soma por le 2017 é sciazada a 3,2 miliuns de euro plü IVA.
Por le momënt él preodü jori de linia da Balsan cun les condiziuns nezesciares por pité n sorvisc fidabl y la segurëza a compagnies de jore interessades. Al resta confermá i jori charter d’isté por les destinaziuns estives. Les previjiuns programatiches por i jori privac y comerziai vëgn fates sön la basa dles esperiënzes bele fates i agn passá. Al vá intratan inant le laur di ofizi provinziai competënc por completé l’operaziun de venüda dla cuotes dla Provinzia tla sozieté ABD Airport Spa. Al é gnü stlüt jö la dorada dla bandida y tosc gnarál dé l’inciaria de sciazada dles cuotes dla sozieté. Daldô gnarál scrit fora le concurs de venüda a livel europeich sciöche preodü dales prescriziuns dl ENAC (l’Ënt nazional por l’aviaziun zivila). La bandida por la chirida de sozietés interessades ala conzesciun é preodüda por da d’altonn.
USP
