Dala Junta: löm vërda al program anual dla STA
Infrastrotöres feroviares y mobilité sostenibla: chisc é i punc zentrai dl program anual dla STA aprové dala Junta provinziala.
Sostigní les formes de mobilité sostenibla, la gestiun dla linia feroviara Maran-Malles, l’aministraziun de imobiliars coliá al sorvisc dl trasport publich, la sensibilisaziun ala segurëza stradala: chisc é ma n valgügn compic dla STA (Strotöres trasport Südtirol), “na sozieté inhouse – sotlignëia l’assessur Florian Mussner – che á n rode fondamental por la Provinzia: dal svilup dla rëi dl trasport publich ala gestiun dl sistem tarifar passan por les soluziuns plü inovatives orientades tl vers dl dagní.” Propi sön proposta dl assessur Mussner á la Junta provinziala aprové incö danmisdé ai 23 de ma le program anual dla STA da sis miliuns de euro.
Danter i proiec él da ciafé la modernisaziun dl sistem dl trasport publich sön scines, te na manira particolara por ci che reverda la ferovia dla Val Venosta, les ferates FLIRT nöies y les staziuns, mo ince i coliamënc sura i confins fora y le mioramënt dl coordinamënt danter les corieres cun les ferates y i trus dles rodes. Dal 2017 inant gestësc la STA ince döt le sorvisc dl Südtirol Pass, che gnê denant manajé dala SAD. Indere por ci che reverda la Green Mobility é la STA dër ativa tl setur dla mobilité eletrica, dles rodes y cun scomenciadies de sensibilisaziun. Ince por merit dl pachet #viajésmart dla Provinzia él preodü n sostëgn finanziar pro la cumpra de veicui eletrics nüs, la realisaziun de staziuns de refornimënt por rodes eletriches tles staziuns feroviares y na colaboraziun tres plü strënta cun i comuns y les assoziaziuns turistiches.
Por ci che reverda la segurëza stradala, n ater pilaster dla STA, él preodü de plü scomenciadies al Safety Park por chi dla roda y chi che á na patent da püch. La STA sostëgn ince campagnes de sensibilisaziun por jogn y scores tl contest de SOS Zebra y Hallo Auto.
USP
