Prejentazion dla chertes cun i toponims ladins te Sëlva ai 31 de mei
La prejentazion dla chertes ortofoto cun i toponims ladins dl Chemun de Sëlva unirà a se l dé ai 31 de mei dala 17.00.
La nrescida sun i toponims ie de gran mpurtanza per na mendranza linguistica, dantaldut per l’identità culturela. Tl raion ladin vën i microtoponims dantaldut dant per ladin. Per i majeri toponims (chemuns, ridli) abinen nce curespundënzes tudësces y talianes.
L Istitut Ladin Micurá de Rü à giapà la ncëria dal Chemun de Sëlva de adaté i dac per la stampa dla cherta toponomastica de Sëlva. Deberieda cun l tecnicher Elmar Irsara, che se à bele cruzià dla chertes ortofoto y toponomastiches de Santa Cristina y dla Val Badia dates ora dal Istitut Ladin, iel unì cuncià ite i dac georeferenziei sun la chertes ortofoto. Sun la chertes iel unì abinà adum ntëur 1600 inuemes.
L Chemun de Sëlva, l Istitut Ladin Micurá de Rü, la Lia Cultura y Usanzes Sëlva, l Assessorat per la scola y cultura ladina, la Bibliotech "Oswald von Wolkenstein" y l Tublà da Nives, Ve nvieia de cuer ala prejentazion dla chertes ortofoto cun i toponims ladins dl Chemun de Sëlva,
n mierculdi, ai 31 de mei 2017,
dala 17:00
tl Tublà da Nives
te Sëlva.
Do la paroles de salut dl assessëur ladin Florian Mussner y dl ambolt de Sëlva Roland Demetz rujenerà Josef Mussner dla cronistoria dla chertes y Anton Senoner di toponims dl Chemun de Sëlva. La chertes ortofoto unirà prejentedes dal diretëur dl Istitut Leander Moroder.
USP
