EuregioFamilyPass: dal 1 de jügn vëgn la cherta nöia partida fora
L’EuregioFamilyPass sará varënt dal 1. de jügn inant cun la funziun dopla de cherta de iade por le trasport publich local y cherta cun vantaji por les families.
Dal pröm de jügn gnarál baraté fora debann le SüdtirolpassFamily cun la cherta nöia EuregioFamilyPass. Les 45.000 porsones che s’anüza dl SüdtirolpassFamily ciafará la cherta nöia diretamënter a ciasa. Por düc chi che fajará domanda por le pröm iade sarál da paié 20 euro, sciöche bele sëgn por vigni atra cherta. “Cun la trasformaziun dl SüdtirolpassFamily te na cherta nöia sarál poscibl da amplié la funziun dla cherta, cun tarifes a bunmarcé tl trasport publich y vantaji ince te d’atri seturs dla vita da vigni de”, dij l’assessur provinzial por la mobilité Florian Mussner.
“Indöt él 150 botëghes y strotöres fej para ala scomenciadia, cun smendrimënc di prisc cina al 50 porcënt. Ara ne é insciö nia ma plü na cherta por le trasport publich, mo ince cun vantaji por tröpes families”, sotlignëia l’assessuria provinziala por les families Waltraud Deeg. Tosc sará la cherta ince varënta sön düc trëi i raiuns dl Euregio Südtirol, Trentin y Tirol, mo nia sciöche cherta de trasport. Cun l’ativaziun dla cherta nöia gnarál ince surantut i chilometri bele fac dal consumadú y ince la soma di scioldi registrada sön la cherta. Dötes les tarifes resta les medemes.
Dal 1. de jügn inant podará düc i geniturs cun almanco un n möt fá domanda por n’EuregioFamilyPass paian na cuota de 20 euro sce ai fej domanda por le pröm iade. Düc i atri ciafa l’EuregioFamilyPass debann a ciasa. La domanda mëss gní fata online sön la plata internet www.mobilitaaltoadige.info. Tres l’account personal sot a mobilitaaltoadige.info sarál poscibl da ativé la cherta nöia. La lista dles strotöres che fej para gnará ajornada tresfora y la verjiun plü atuala sará da ciafé sön la plata internt dl’Agenzia por la familia, http://www.provincia.bz.it/familypass. Por ciafé informaziuns plü monüdes pón ince telefoné al numer 8400 000 426.
USP
