Dala Junta: ativités estives, garantida la curida di cosć
I termins por i contribuc a chi che organisëia les ativités da d’isté por mituns y jogn é gnüs spostá. Curida la maiú pert di cosć dal’aboliziun di voucher.
L’aboliziun dl sistem di voucher a livel statal á cherié na seria de problems ince tl Südtirol. Dantadöt ince por ci che reverda les cooperatives y les assoziaziuns che pita sorvisc d’ativité estiva domisdé por mituns y jogn y che paia gonot fora sü dependënc cun chësta forma de paiamënt. Zënza i voucher essel porté a n aumënt sostanzial di cosć coliá al personal cun conseguënzes nia ma por i fornidus dl sorvisc, mo ince por les families. Por ti jí adincuntra ales cooperatives y assoziaziuns á la Junta provinziala aprové na deliberaziun dl’assessuria Waltraud Deeg cun la poscibilité da presenté les domandes de contribut cina ai 30 de jügn.
Curida complessiva dla maiú pert di cosć
“Te chësta manira sarál la poscibilité da fá ciamó domandes implü por curí la maiú pert di cosć”, spliga l’assessuria Deeg. Do na pröma sciazada fata dal’Agenzia por les families vëgnel araté na soma de 3 miliuns de euro, te vigni caje garantësc la Junta provinziala la curida dl 100 porcënt dla maiú pert di cosć dl personal. “I sun dla minunga che al é nosc dovëi da garantí chësc sorvisc fondamental sides por i geniturs, por garantí la conziliaziun danter laur y familia, co ince por i mituns y jogn, che ará la poscibilité da fá ativités da d’isté”, insciö Deeg.
Ativités da d’isté: les zifres atuales
Tl 2017 él bele gnü presenté indöt 267 domandes de contribut por 267 proiec partis sö sön döt le teritore. Al é indöt 97 Comuns che fej para, la soma bele metüda a desposiziun dan la daurida por fá domanda é de 6,6 miliuns de euro. Les ativités da d’isté y dl domisdé é indöt 270, diesc de plü co l’ann passé cun indöt na zifra de 50mile mituns y studënc danter i 3 y i 15 agn che fej para. 75 proiec é ponsá ince por mituns cun handicap. Dl’organisaziun se crüzia indöt 80 porcënt privac y por i 20 porcënt che resta scores y comuns. Implü él ince da conscidré che 30 cina 40 scolines pita n’assistënza estiva por 3 cina 6 edemes cun indöt 200 colaboradësses pedagogiches.
I finanziamënc é tl laur da crësce
Dal punt de odüda finanziar él da sotligné la chersciüda costanta di investimënc efetuá dala Provinzia te chësc setur: dai 3,4 miliuns de euro tl 2011 esun passá a 4,7 miliuns tl 2015 rovan a 6,6 miliuns tl 2017, che cun l’aprovaziun dla deliberaziun da incö passa a 9,6 miliuns de euro.
USP
Galaria dales fotografies
