Dala Junta: assistënza d’emergënza ince tles zones periferiches
I doturs de basa podará daidé para pro le sorvisc d’emergënza por garantí l’assistënza tles zones periferiches. Löm vërda dla Junta provinziala.
Sciöche bele raporté él sté i doturs de medejina generala che á garantí te Gherdëna, tla Val Venuesta y tla Val de Puster le Sorvisc de emergënza provinziala cina la sentënza negativa da pert dla Curt dla Cassaziun. Chësta tematica é gnüda tratada insciö de plü iadi tl curs dles tratatives contratuales cun i doturs de medejina generala. I rapresentanc provinziai y di doturs é de conseguënza rová ala dezijiun che i doturs de basa pó indô surantó le Sorvisc d’emergënza sce ai á les condiziuns damanades. Danter chëstes él na formaziun spezifica cun l’ajornamënt detaié tl ciamp dla medejina de pröm aiüt, sciöche ince la detlaraziun de desponibilité da pert dl dotur de medejina generala. Tratan so intervënt mëss le dotur assiguré la continuité dl’assistënza de medejina generala tl raiun tres n dotur de sostituziun.
“I un insciö araté che le sorvisc de emergënza pois gní sostigní ince dai intervënc di doturs de basa presënc söl teritore. Te chësta manira vëgnel garantí le tratamënt di paziënc te na manira asvelta sparagnan ince sön les ressurses.” Le davagn por l’intervënt dl dotur de medejina generala gnará paié fora te na manira forfetaria. “Por merit de chëstes mosöres sun indô tla situaziun de podëi garantí na maiú segurëza dla medejina de pröm aiüt tles zones periferiches”, á stüt jö la Stocker.
USP
