Sanité: Bornech y Porsenú, plü liberté pro i doturs de familia
La Junta provinziala á mudé les arees di raiuns sanitars de Bornech y Porsenú. Stocker: “Plü liberté da chirí fora por i paziënc”
Cun l’obietif da ciafé na soluziun ala diminuziun di doturs de familia y da garantí le medemo livel de assistënza a döta la popolaziun á la Junta provinziala tut la dezijiun ai 13 de jügn da mudé les arees di dui raiuns sanitars de Bornech y Porsenú. Cina sëgn ê i dui seturs partis sö al intern indô te dui seturs. Tl raiun “Porsenú y vijinanzes” él atualmënter en sorvisc 22 doturs de medejina generala a chi che al pó fá referimënt i paziënc di comuns dles localités de Porsenú, Lijun, Vahrn, Mühlbach, Natz-Schabs, Rodeneck y Vintl. Por ci che reverda le raiun de “Bornech y vijinanzes” él en sorvisc 23 doturs de basa por i Comuns de Bornech, Percha, Gais, San Laurënz, Kiens, Terenten y Falzes. Chësc ó sëgn dí che n paziënt dl Comun de San Laurënz pó ince jí a damané do assistënza sanitara a n dotur de Falzes yii.
La dezijiun da mudé i raiuns teritoriai é gnüda tut do che n dotur de Mühlbach é jü en ponsiun y sü paziënc â de conseguënza na gran dificolté da ciafé n dotur de sostituziun. Sëgn pó i zitadins de chësc comun fá referimënt a düc i doturs dl raiun y nia ma plü cina Natz, Rodeneck y Vintl, sciöche al ê preodü da la spartiziun atuala. Tosc ti gnarál mené ai paziënc na lëtra cun i inoms de düc i doturs dl raiun sanitar.
“Al se trata – á comenté l’assesuria por la sanité Martha Stocker – de na mosöra ajuntiva por ciafé na soluziun al problem dl numer di doturs. L’obietif prinzipal é chël da ti pité ai zitadins n’assistënza de cualité y valia sön döt le teritore”. Atualmënter él 40 doturs che fej la formaziun de medejina generala y che podará mët man da lauré ti proscims trëi agn.
USP
Galaria dales fotografies
