De dles donaziuns dl sanch, te Südtirol n’él 24mile
Tl 2016 él 18.926 porsones che á fat 24.137 donaziuns de sanch. Le debojëgn local é insciö curí, al vëgn lauré sön la sensibilisaziun di jogn.
I donadus de sanch tl Südtirol é de 13.109 ëi y de 5.817 ëres che á fat 24.137 donaziuns tl 2016: la fascia d’eté che é plü rapresentada é chëra che vá dai 39 ai 45 agn, dal 1982 cina sëgn él gnü registré indöt 350mile donaziuns. En ocajiun dl De mondial dles donaziuns dl sanch á l’assessuria por la sanité Martha Stocker rengrazié i donadus y les donadësses recordan che “tröc südtirolej fej insciö n’opera de generosité y de solidarieté tl confrunt dl proscim. Tröpes porsones á podü insciö gní salvades, por ejëmpl vitimes de inzidënc, amará de tumor y paziënc che á fat n traplant”. L’assessuria fej insciö l’apel da sostigní inant chësta scomenciadia y da se mët a desposiziun por la donaziun de sanch. Ince deache tl 2016 é le numer di donadus de sanch jü zoruch de 426 volontars, tröc de chisc ince deache ai á superé le limit d’eté. Sciöche l’assessuria Stocker recorda é la dorada dla donaziun de sanch dai 5 ai 8 menüc lungia.
Da 20 agn laora bele la Provinzia de Balsan cun n plann dl sanch che cür insciö le debojëgn a na manira da partí sö bun les donaziuns sön döt l’ann y le teritore. Chësta organisaziun é poscibla ince por merit dla buna colaboraziun danter l’organisaziun di donadus dl sanch AVIS, le zënter dles transfujiuns a Balsan adöm ai ofizi provinziai competënc.
USP
