Jobs act dl laur autonom: regolamentaziun nöia por la maternité
Le Jobs act dl laur autonom prevëiga mioramënc por la maternité, paternité y ince mosöres ajuntives por les Tagesmütter.
Ampliamënt dla maternité y paternité da 3 a 6 mëisc, poscibilités de ester rapresentá por na perioda da n colegh, le dërt ala indenité de maternité ince sce an laora inant. Chisc é i mioramënc prinzipai dla politica familiara por ci che reverda le Jobs act dl laur auronom jü en fora da püch. I mudamënc reverda düc i lauranc autonoms y free lance che ne é nia scric ite a ordins profescionai, sciöche por ejëmpl profescionisć dl setur IT y de interprec. I mudamënc ne vel indere nia por architëc y avocac.
“Al é dantadöt tröc jogn che laora te chisc seturs. Cun chësta mosöra él gnü adaté la lege ales condiziuns atuales dl marcé dl laur”, dij l’assessuria Waltraud Deeg. Insciö ne él nia ma preodü mioramënc por ci che reverda la maternité y paternité, mo ince alisiraziuns fiscales, sciöche por ejëmpl la poscibilité da trá jö dales cutes les spëises por formaziun y ajornamënt profescional. Al vëgn ince mioré la proteziun ti caji de maratia. N punt important por le Südtirol reverda la previdënza por les Tagesmütter (Umes dl De), che dal pröm de setëmber sará assigurades y classificades sciöche laurantes dependëntes. “Al é na mosöra importanta por scombaté condiziuns economiches svantajades tratan la ponsiun y por mioré les condiziuns de laur”, comentëia Deeg.
USP
