FESR: 7 miliuns de euro implü por l’internet asvelt
L’Ofize Infrastrotöres por les telecomunicaziuns pó s’anuzé dles ressurses FESR por jí inant cun la curida dla rëi dla fira otica tles zones produtives.
Le program „Investimënc a bëgn dla chersciüda y dl’ocupaziun“ dl FESR, che reverda la perioda 2014-2020, á na dotaziun de 136 miliuns de euro che vëgn metüs a desposiziun por le 50 porcënt dal’Uniun Europeica, por le 35 porcënt dal Stat y por le 15 porcënt dala Provinzia. La Junta provinziala á aprové dan da püch la cuinta pert dl program che reverda 7 miliuns de euro da investí tl setur dl contest digital por realisé na seria de proiec dla fira otica söl teritore provinzial. La pröma pert di 7 miliuns de fonds europeics FESR, aprovada d’agost dl 2016, reverda laurs de coliamënt cun l’internet asvelt te indöt 18 Comuns dl Südtirol cun l’ativaziun de 105 PoP (i punc de destribuziun dla fira otica). Atualmënter él insciö coliá ala rëi dla banda leria (almanco 100 megabit por secund) 349 frabicac publics te 58 Comuns. Tl 2017 él preodü n ater avis por fonds FESR a bëgn dla curida cun l’internet asvelt tles zones artejanales.
“Le potenziamënt dla rëi dla fira otica vá inant ince por merit dl program FESR, che prevëiga la conesciun cun l’internet asvelt dantadöt tles zones produtives. L’internet é n fatur nezesciar por les impreses, nia ma por garantí i posć de laur mo ince por evité la spopolaziun dles valades y por garantí la cualité de vita”, sotlignëia l’assessuria Waltraud Deeg. Dötes les informaziuns y les bandides por le program FESR pon lí do sot a: www.provincia.bz.it/fesr
USP
