Dala Junta: finanziamënc por 14 films, retüda de 3,7 miliuns
Aprovaziun dala Junta provinziala por le finanziamënt de 14 produziuns de films y documenars. Le davagn preodü söl teritore é de 3,7 miliuns.
La Junta provinziala á dé süa aprovaziun a 2,2 miliuns de euro de finanziamënc por le sostëgn di films, dles fiction y di documentars realisá tl Südtirol. Al é preodü na retüda söl teritore de indöt 3,7 miliuns de euro. I esperc dla comisciun y dla IDM Südtirol, l’Aziënda speziala por l’economia, á chirí fora i 14 proiec da sostigní tres le Fonds südtirolej dles produziuns de chisc nen sarál 4 dal Südtirol, 5 dal rest dla Talia, 3 dala Germania y 2 dal’Austria. Danter i films che vëgn sostignis él ince n documentar sön la vita de Hans Kammerlander, n film por mitans y mituns dal titul “La befana vien di notte” cun Paola Cortellesi, implü n film dl regista y atur roman Alessandro Gassman, “Der Trafikant” cun Bruno Ganz y “Bakuninhütte”, n documentar sön i movimënc d’anarchia che gnará realisé dal südtirolej Martin Hanni.
“Por ci che reverda i finanziamënc y les produziuns sostignides é nosta Provinzia la fujina regionala plü importanta dla Talia”, á sotligné le vizepresidënt Christian Tommasini incö do la conferënza stampa. Dal 2010 cina aldedaincö él gnü sostigní 167 proiec cun passa 2.600 dis de produziun tl Südtirol por n valur stimé de 45 miliuns de euro. La condiziun por ciafé n finanziamënt publich é chëra che les produziuns televisives y cinematografiches reinvestësces tl Südtirol almanco le 150 porcënt de chël che ai á ciafé. Tratan la produziun di 14 proiec apëna aprová dala Junta él preodü indöt 172 dis de produziun tl Südtirol.
USP
Galaria dales fotografies
