Süta: al é dër da mët averda pro i füc dl Sacher Cör
Le Sorvisc forestal recorda che al é dër da mët averda pro i Füc dl Sacher Cör en domënia ai 25 de jügn porvia dla gran süta cun le prigo de medefüc.
Temperatöres mesanes cina 36 degrá y la mancianza de plöies é na combinaziun potenzialmënter dër prigorosa por medefüc ti bosć, sotlignëia le diretur dl Ofize Aministraziun forestala Florian Blaas. Deache an registrëia tl Südtirol dötaurela na süta dër lungia él da mët dër averda ales prescriziuns por ci che reverda la prevenziun cuntra i medefüc, dantadöt en gaujiun dla festa dl Sacher Cör de Gejú en domënia ai 25 de jügn. En chël de él usanza tl Tirol da fá füc sö por munt.
Düc i zitadins é porchël periá da respeté la proibiziun generala da fá füc a na destanza de almanco de 20 metri dal bosch. Por fá füc a na destanza mëndra di 20 metri él nezesciar da avëi n’autorisaziun straordinara dal Ispetorat forestal competënt te chël teritore (por fá domanda pon tliché chiló). Al vëgn aconsié implü da evité vigni atra sort de comportamënt che podess porté te bosch a taché füch, sciöche por ejëmpl sciuré ia por tera moc de zigarec o solprins. Sce al é valgügn che vëiga che al mët man da verde spo él atira da cherdé sö le numer d’emergënza 115, la zentrala dl Corp permanënt di Stödafüch.
USP
