Dala Junta: bilanz do le bur’ tëmp, indöt 230 intervënc
La Junta provinziala á fat n bilanz do l’ona de temporai dl fin dl’edema: passa 230 intervënc, cun le sistem dla proteziun zivila che funzionëia.
I temporai dla nöt danter i 24 y i 25 de jügn á atoché te na manira particolara la Val d’Isarch tles vijinanzes de Tlüses y spo ince la val dl Sarenthein y le raiun de Balsan. Smöies y rüs che é jüs porsura é stades les conseguënzes plü posoces. La Junta provinziala á incö ai 27 de jügn analisé la sitaziun rengrazian dötes les unités d’intervënt che á daidé para te chësta operaziun de proteziun zivila. “I un podü costaté che i dagns de chësc evënt straordinar é mesans, ince por mirit dles operes de prevenziun idrogeologica realisades ti ultims agn. Les strades é gnüdes liberades te na manira asvelta y la zircolaziun dl trafich é gnüda garantida. La situaziun, ince sce te na situaziun de emergënza, é stada sot a control da pert de n sistem che á funzioné bun y che á confermé da podëi manajé situaziuns de prigo”, á sotligné le presidënt Kompatscher.
Danter sabeda y domënia á i Stödafüch albü da manajé 230 intervënc, de chisc bëgn 140 ma a Balsan: daidé para ne á insciö nia ma le personal dl corp permanënt, mo ince i volontars da Gries, da Balsan zënter y da Haslach, sciöche ince da Andrian, Siebenaich, Terlan, Frangart y Kaltern. Al é gnü liberé trëi auti che ne sciafiâ nia da jí inant, implü á i Stödafüch pumpé fora l’ega dales cianos y dai garasc.
Nia ma i Stödafüch mo ince i colaboradus dl Sorvisc Strades á lauré tresfora tratan la fin dl’edema, te na manira particolara tl Comun de Eppan y sön la statala dl Prener a Tlüses. Chiló él gnü trasporté demez zirca 10mile metri cubich de material do che al é gnü jö na smöia sön strada che é indô gnüda daurida inier da sëra dales 19.00, mo ma cun na regolamentaziun alternanta dl trafich. Indöt él sté söl post le Sorvisc Strades cun 16 camions y 5 pacheres. Le fat che tla Val d’Isarch él ma jü porsura de pici rüs é la conseguënza de na buna stabilité dles zones de contignimënt. Por deliberé i resservars dal’ega él l’Agenzia por la proteziun zivila che á metü a desposiziun 125mile euro.
USP
Galaria dales fotografies
