Dala Junta: Turism, valutaziun ambientala, apoteches
Danter les dezijiuns tutes dala Junta provinziala él l’aprovaziun di dessëgns de lege sön la reorganisaziun tl setur dl turism y sön la valutataziun ambientala.
N cheder nü por les organisaziuns turistiches, cun na strotöra plü asvelta, jará en forza dal 1 de jená dl 2018. La Junta provinziala á aprové ai 4 de lugio les mudaziuns legislatives che sará la basa dla reorgansaziun tl setur dl turism (le motor por l’economia, á dit le presidënt Arno Kompatscher): cina sëgn ê i liví dötadöm trëi (Agenzies de promoziun, Consorc turistics, assoziaziuns locales), sëgn vëgnel tut demez le livel mesan di consorc. Dal 2018 inant restél insciö confermades les 76 assoziaziuns turistiches y les sozietés cooperatives turistiches, les döes Aziëndes de sojornanza de Balsan y Maran. Al toma indere demez i 10 Consorc dl turism. Le dessëgn de lege regolamentëia avisa i compic y le sostëgn ales organisaziuns turistiches y al’Aziënda speziala "Innovation Development Marketing Südtirol/Alto Adige (IDM)” por ci che reverda les competënzes tl setur dla promoziun turistica.
“IDM cun sües sëntes destacades y süa consulënza fajará da coordinamënt tl setur dl svilup dl produt y sará responsabl de düc i aspec che reverda la comunicaziun ti marciá desvalis. Les assoziaziuns turistiches sará responsables dl svilup dl produt a livel local y regional cun l’organisaziun de manifestaziuns y la cura di ghesć. Chësc dessëgn de lege é le resultat de n prozes partezipatif de dui agn porté sëgn a piz adöm a dötes les perts interessades”, spliga le presidënt Kompatscher. Implü vëgnel dötaurela ince atué le proiet de reorganisaziun “Zukunft Tourismus/Futuro Turismo”, a chël che al fej pert les assoziaziuns y organisaziuns turistiches, la IDM Südtirol, le Consorz di Comuns y l’Aministraziun provinziala. L’obietif de chësc proiet prevëiga la creaziun de speres de esperiënzes che vá sura i confins di consorc turistics fora se conzentran sön les tematiches turistiches. Do la contlujiun de n concurs publich á la IDM Südtirol tut sö te chisc dis 48 colaboradus nüs, danter chisc nen él 39 che vëgn dai consorc turistics atuai. Les sëntes de laur sará Bornech, Santa Crestina, Porsenú, Balsan, Maran y Glurns.
N’atra dezijiun tuta incö da pert dla Junta provinziala é stada l’aprovaziun dl dessëgn de lege provinziala sön la valutaziun ambientala por planns y proiec. L’aprovaziun di proiec che á faziuns importantes sön l’ambiënt vëgn regolamentada dales diretives europeiches. Chëstes diretives é gnüdes mudades de plü iadi ti ultims agn, dantadöt por ci che reverda les prozedöres, y é spo gnüdes rezepides dai Stac mëmbri cun desposiziuns spezifiches. Al é porchël ince nezesciar da mudé la lege provinziala 2 dl 2007. “I ne un nia ma mudé la lege, mo i un tut la dezijiun da nen fá na nöia”, sotlignëia l’assessur por l’ambiënt Richard Theiner. Le dessëgn de lege nü, aprové incö dala Junta y che gnará sëgn ejaminé tl Consëi provinzial, regolamentëia dötes les prozedöres de autorisaziun por chëres che al é preodü na valutaziun trasversala de planns o de proiec y che reverda ince na partezipaziun publica y dles autorités cun competënzes ambientales.
L’adatamënt plü ampl ales diretives europeiches é sté nezesciar pro la valutaziun dl impat ambiental. “Le Stat á adaté sües normes ales diretives UE do che la Curt de iustizia europeica á plü iadi contesté che al ne basta nia ma da stabilí n valur mascimal, sciöche por ejëmpl la grandëza dl proiet. Al mëss indere ince gní tut en conscidraziun d’atri criters de valutaziun, sciöche le post olache le proiet vëgn realisé o l’area de sconanza”, spliga le diretur dl Ofize Valutaziun impat ambiental Paul Gänsbacher. Le dessëgn de lege á ince na seria de mudaziuns che prevëiga na scemplifcaziun dles prozedöres y n iter d’aprovaziun plü asvelt.
Löm vërda da pert dla Junta provinziala ince al’assegnaziun de 17 sëntes de apoteches ti Comuns de Balsan (6), Maran (2), Porsenú, Bornech, Eppan, Kaltern, Leifers, Kastelbell-Tschars , Ritten, Sarenthein y Solaneres. I davagnadus dl concurs d’assegnaziun ará sëgn tëmp un n ann por daurí les apoteches.
USP
