Dala Junta: #dolomitesvives indoman sön ju dl Sela
La Junta provinziala á aprové les ressurses nezesciares por l’organisaziun y la promoziun dl proiet de daurida dl ju dl Sela ma por la mobilité ecosostenibla.
Mercui ai 5 de lugio dl 2017: dales 9 ales 16 sará la strada che porta söl ju dl Sela ma daverta por mesi eletrics, rodes y jënt che vá a pe. “Al mët man na perioda nöia por i jus dolomitics – dij l’assessur por l’ambiënt Richard Theiner – y nosc obietif é chël da sostigní na filosofia de vita nöia por ci che reverda la convivënza danter porsona y munts: düc dess tigní en conscidraziun che te na zona tan sensibla sciöche les Dolomites él ma poscibl da se möi cun respet tl vers dl ambiënt y dla contrada.”
Vigni mercui de messé y agost
Le proiet #Dolomitesvives prevëiga che le ju dl Sela sará davert ma por veicui eletrics, rodes y peduns vigni mercui de lugio y agost dales 09.00 ales 16.00. Indöt sará le ju dl Sela saré nü iadi por veicui che consumëia ciarburant. La Junta provinziala á aprové ai 4 de messé les ressurses nezesciares por organisé les manifestaziuns culturales y por la comunicaziun dla scomenciadia. L’investimënt é de 203mile euro y ti é gnü assegné ala sozieté speziala IDM che se fistidëia dl’organisaziun y dla comunicaziun a livel statal y internazional de #dolomitesvives.
Monitoraje söl impat dl proiet
Implü sarál ince l’EURAC che se fistidiará de fá n’analisa de monitoraje cun inrescides cualitatives söi jus y sön les conseguënzes dla stlüta por i residënc y i ghesć, sciöche ince por les impreses atives tl setur dl turism y dl’economia en general. L’Ofize provinzial competënt fajará ince n’analisa cualitativa di valurs dl’aria tratan i mëisc da d’isté incër le Ju dl Sela tratan i dis de #dolomitesvives.
Söi jus roda söporjö 1,2 miliuns de auti al ann
Por sotligné le valur dla scomenciadia recorda l’assessur Theiner che “vigni ann él zirca 1,2 miliuns de auti che roda söi jus dles Dolomites, cun n valur mesan d’isté de 2.300 veicui al de. Al se trata insciö de n segnal important, ince sce nia ciamó dezisif.” La pröma tapa de #dolomitesvives gnará insciö a se le dé indoman, ai 5 de lugio, cun la manifestaziun prinzipala dales 13.00 dlungia le Mountain Resort söl Ju dl Sela: al sará presënc l’alpinist Reinhold Messner, i assessurs Florian Mussner y Richard Theiner y l’assessur trentin Mauro Gilmozzi. Dla cornisc musicala se fistidiará les musighes de Fascia, de Gherdëna y dla Val Badia.
USP
