Internazionalisaziun: Aprovada na colaboraziun cun le Ministere
Por sostigní les esportaziuns y l’internazionalisaziun gnarál a se le dé na colaboraziun strënta danter le Ministere por l’ester y la Provinzia de Balsan.
Por amplié la colaboraziun dles aziëndes y firmes talianes él gnü stabilí incö ai 19 de messé dal Minister di afars cun l’Ester Angelino Alfano y dal Presidënt dla Provinzia Arno Kompatscher na colaboraziun tl setur dl comerz foradecá, plü avisa por ci che reverda l’internazionalisaziun dles impreses. De conseguënza sarál le fornidú de sorvisc IDM (Innovazion, Development, Marketing) che aconsiará y sostignará les candidatöres de aziëndes talianes tres le Ministere por i afars cun l’ester y la Cooperaziun internazionala.
“Les zifres che reverda le comerz cun l’ester desmostra n trend positif, cun l’aumënt dl 4,6 porcënt ti pröms sis mëisc dl 2017 en confrunt ala medema perioda dl ann da denant”, á sotligné le Presidënt dla Provinzia Arno Kompatscher, “mo nosta intenziun é chëra da sostigní tres inant l’esport de sorvisc y marcianzies y da ti pité ales impreses südtirolejes n azes plü saurí ai marciá internazionai.” Te chësc contest vëgnel ince renforzé le svilup y l’ampliamënt dla rëi de sorvisc che dëida les impreses pro l’internazionalisaziun, á dit le Presidënt.
Chësc é le compit y l’inciaria dl fornidú de sorvisc IDM Südtirol. L’Aziënda speziala dla Provinzia y dla Ciamena dl Comerz sostëgn l’internazionalisaziun dles aziëndes südtirolejes, dantadöt les piceres impreses y chëres mesanes che é le pilaster dl’economia locala.
Le Minister por i afars cun l’Ester Angelino Alfano á presenté les scomenciadies dl Stat por ci che reverda la candidatöra dla Talia al ester. Le Ministere por i afars cun l’Ester y la Cooperaziun al Svilup fej pert dla “direziun generala por la promoziun dl sistem Paisc DGSP” che se crüzia dla candidatöra dla Talia te na manira unitara, dal’economia, ala cultura y sciënza. Chësta istituziun á ince le compit da sostigní les ghiranzes y i interesc dles regiuns.
Deache la Provinzia y le Ministere a á la medema ghiranza da avëi n azes alisiré ai marciá internazionai él gnü tut la dezijiun da colaboré: le Ministere metará insciö a desposiziun dla Provinzia de Balsan y dl’Aziënda IDM sües sëntes al ester, les ambasciades y les sëntes consulares por scomenciadies de marketing, incuntades cun aziëndes y firmes che é de interes por l’economia südtiroleja.
Le Südtirol da süa pert indere informará le Ministere por i afars cun l’ester de sües scomenciades y fajará scomenciadies deboriada. L’acordanza prevëiga ince che le personal dla IDM podará lauré para pro scomenciadies dl Ministere, sce les finalités é en acordanza cun i programs di fornidus economics locai. Implü él ince gnü stabilí n barat d’informaziuns sön investidus potenziai.
Trames döes les perts á dit de ester otimistes da avëi metü man na colaboraziun efiziënta. “Chësta acordanza ará vantaji por entrames les perts, dantadöt por l’economia sütiroleja y por nostes impreses”, á dit le Presidënt Kompatscher. Les aziëndes dl Südtirol á capí l’importanza dl’internazionalisaziun y da se daurí a marciá nüs, á dit Kompatscher, l’acordanza stabilida incö é n valur implü por se daurí al marcé internazional da pert di imprenditurs locai cun l’aiüt dla IDM.
Imajes de Alfano che röia a Balsan - https://we.tl/BpLGk76bsp
USP
Galaria dales fotografies
