Pendolars a Balsan, Mussner: „No ala stlüta, amplié l’oferta”
“Stlü Balsan ai pendolars é n dann por la cité”: chësc dij l’assessur Mussner che é por l’ampliamënt dl trasport publich sciöche soluziun al problem dl trafich
L’assessur por la mobilité Florian Mussner é a öna cun l’ombolt da Balsan Renzo Caramaschi por ci che reverda l’ajornamënt costant dl plann dla mobilité dla cité de Balsan por manajé te na manira otimala le trafich. Mo l’assessur é cuntra la proposta da stlü le capolüch ai pendolars, idea presentada da Caramaschi dan da püch. “Secundo me él na proposta che vá massa inant y i ne me pó nia m’imaginé che ara sides ince poscibla da realisé cun n conzet tler doia. Al vá de bojëgn de n proiet ampl por smendrí le trafich che röia te cité a Balsan.” Por Mussner la stlüta dles strades por pendolars y studënc ne é insciö nia n’alternativa poscibla, “ince deache metodes radicales ne é nia la dërta strada por rové a de bugn resultac”. Por l’assessur él indere important da lauré sön i conzec de mioramënt dl trasport local y de sensibilisaziun dla popolaziun.
“I sun bele da agn che i laorun adöm ala aministraziun comunala por fá a na manira che i mesi dl trasport publich sides n’alternativa concreta ala mobilité privata, cun vari costanc por ejëmpl tres l’ampliamënt di orars dles corieres y dles ferates”, spliga l’assessur Florian Mussner. N proiet ajuntif che dess cherié n’oferta publica plü atraënta é le completamënt dles corsies aposta por le metrobus. Cina la fin dl’isté sará i laurs de 5 di 9 loc stlüc jö.
“N metrobus efiziënt y coliamënc otimai cun les corieres y les ferates é dui proiec che miorëia la situaziun, mo an ne podará mai curí döt le spostamënt de pendolars ma cun i mesi publics. La Provinzia sostëgn le Comun por ci che reverda düc i proiec de diminuziun dla mobilité privata, mo an ne dess nia se desmentié che i pendolars é ince na richëza por la cité conscidran i seturs dl’economia, dla cultura y dla sozieté. Ai ne é insciö nia ma n pëis, mo n arichimënt real por la vita dl capolüch”, dij Mussner.
USP
