Incuntades cun na laurs, regoles de comportamënt
Tigní i cians ala corda. Chësta é öna dles regoles plü importantes sce an ess da incunté na laurs, recorda l’Ofize Ciacia y pëscia.
Do l’incuntada de na laurs cun na porsona gnüda a se le dé chisc dis tl Trentin él l’Ofize Ciacia y Pëscia che recorda l’importanza de n valgönes regoles fondamentales sce an ess da incunté na laurs. “Dantadöt sarál ince de importanza fondamentala da capí ci che al é sozedü avisa tles vijinanzes dl lech de Tergalgo, por fá a na manira da evité situaziuns prigoroses tl dagní”, recorda le diretur Luigi Spagnolli. A vigni moda, deache la porsona ferida ê acompaganda da n cian, él l’Ofize Ciacia y Pëscia che recorda che al é fondamental da tigní i cians ala corda. “An dess tres lascé i cians ala corda o ciaré che ai sides tres tles vijinanzes”, dij Spagnolli. La Provinzia á te chësc contest ince realisé n video por ladin dal titul „Che é pa la laurs? Y co dessi pa me comporté sce i la incunti?“ te chël che al vëgn splighé i comportamënc plü adatá sce an ess da incunté na laurs.
USP
