Trilinguism: ejam de ladin te n format europeich nü
Ai 4 de agost dl 2017 vëgnel fat i pröms ejams de ladin aladô di standarg europeics pro le Sorvisc ejams de bi- y trilinguism.
Tla sënta dl Sorvisc ejams de bi- y trilinguism a Balsan, tla strada Perathoner, vëgnel fat ai 4 de agost dl 2017 i pröms ejams de ladin aladô di standarg de competënza linguistica europeica, sciöche preodü dal Cheder europeich de referimënt por i lingac (QCER).
Ejam de trilinguism partí sö te cater perts
Sciöche i ejams de bilinguism dal 2014 incá, é sëgn ince l’ejam de ladin por i liví A, B y C metü adöm da cater perts: proa da ascuté sö, proa de comprenjiun de n test, proa scrita y proa a usc. La proa de comprenjiun de n test, che vëgn fata pro l’ejam de bilinguism tratan la proa scrita, vëgn fata por l’ejam de ladin tratan la proa a usc. Le livel D, indere, é metü adöm da n ejam a usc, sciöche ince da na proa da ascuté sö. Pro chësc livel ne vëgnel fat degöna proa scrita.
Le decret legislatif di 4 de ma dl 2017, n. 76, jü en forza ai 23 de jügn dl 2017, vëiga danfora ince por le livel D na proa scrita. Chësta mudaziun gnará impormó metüda a jí dl 2018.
Do avëi fat l’ejam tla strada Perathoner 10, vëgn le resultat lascé alsavëi cina trëi dis do la data dl ejam y an pó atira jí a se tó l’atestat de conescënza dl lingaz ladin tla sënta di ejams. I ejams de ladin vëgn fac aladô dl numer de porsones che s’á scrit ite y altamo dui iadi al mëis. L’iscriziun pó gní fata te vigni momënt. Le calënder d’ejam vëgn lauré fora eletronicamënter aladô dl ordin cronologich.
I ejams de conescënza dl lingaz ladin vëgn fac bele da 40 agn incá. Dal 1977 incá él gnü scrit fora 8.575 atestac por düc cater i liví. L’atestat de trilinguism é metü adöm dal atestat de conescënza dl lingaz ladin y da chël de bilinguism (talian/todësch), y ne pó nia mancé por lauré tl'aministraziun publica tl Südtirol, sön n post resservé al grup linguistich ladin.
La comisciun d'ejame
La comisciun ladina é metöda adöm da cater mëmbri, dui por le ladin dla Val Badia y dui por le ladin de Gherdëna. Le comissar dl govern, adöm cun le presidënt dla Junta provinziala, á nominé 8 comissars y comissaries y ti á dé chësta inciaria por trëi agn, plü avisa cina ai 31 de dezëmber dl 2019. Ince l’Istitut ladin Micurá de Rü á colaboré ala reforma dl ejam de ladin, scrion i tesć cun gran prezijiun y competënza.
Incuntades d'informaziun
Da d’altonn vëgnel organisé incuntades d’informaziun tles valades ladines por les porsones interessades, sciöche ince por le personal scolastich. Informaziuns plü avisa vëgn lasciades alsavëi plü inant ai media. Dötes les informaziuns che reverda l’ejam nü de ladin pón ciafé sön la plata internet dl Sorvisc ejams de bi- y trilinguism:
http://www.provinzia.bz.it/formaziun-lingac/bilinguism/l-ejam-de-ladin.asp
Sön chësta plata pón ince ciafé ejëmpli desvalis por vigni proa d’ejam y te tramidui i idioms. Por deplü informaziuns cherdede sö l’Infopoint al numer: 0471 413903.
USP
