Cinema alaleria cun la Teßmann a Balsan
Tles proscimes cater jöbies de agost devënta la curt de letöra dla Biblioteca provinziala, pornanche al vëgn scür, n cinema alaleria.
I films mët man do che al vëgn scür incër les 21.00. Al vëgn lascé ite les porsones dales 20.30 inant. Desdites eventuales por guajia dla plöia gnará comunicades sön la plata internet dla Teßmann, sot a www.tessmann.it. L’entrada ala proieziun di films é debann. La Biblioteca provinziala "Dr. F. Teßmann" á süa sënta tla strada Armando Diaz nr. 8 a Balsan.
„Das Parfüm – Die Geschichte eines Mörders“ (dorada dl film: 142 menü; nia adaté a n publich sot ai 12 agn; por todësch) é le pröm film chirí fora che gnará mostré en jöbia ai 10 d’agost. Le film é n‘adataziun alingrana dl roman de suzes „Das Parfüm“ de Patrick Süskind, cun tl zënter le personaje Grenouille, na porsona stramba che perzepësc le monn tres le sëns dl tof, copan cotan de ëres por s’ impossessé de so tof y cherié adinfora le parföm perfet. La regia é de Tom Tykwer.
En jöbia, ai 17 d’agost, gnarál spo mostré le film “Das Labyrinth der Wörter” (dorada dl film: 99 menüc; nia adaté a n publich sot ai 6 agn) che trata dl roman dl’auturia Marie-Sabine Roger. La storia zentrala dl film roda incër Germain che á sön i 50 agn, al é n manual che sá apëna da lí y da scrí. A scora él tres gnü sceché y te so paisc él conesciü sciöche tec. Süa vita se müda canche al incunta Margueritte, che á passa 90 agn. Süa amizizia y so amur por la letöra ti deura sö a Germain n monn nü. La regia é de Jean Becker.
Le film dal titul “Small World” (dorada dl film: 94 menüc;nia adaté a n publich sot ai 6 agn) é sön le program en jöbia ai 24 d’agost. Al sará da odëi la filmaziun dl roman todësch-franzej che porta le medemo inom dl roman de Martin Suter. Cun l’eté vëgnel datrai dant tla cosciënza recorc dl‘infanzia che é plü stersc di avenimënc dl de passé. Insciö ti vára avisa ince a Konrad, le ponsadú lëde che vëgn zoruch a vire tl ciastel dla familia industriala Senn, te chëra che al ê chersciü sö. La regia é de Bruno Chiche.
Sciöche contlujiun dl’cinema alaleria gnarál mostré en jöbia, ai 31 d’agost le film “Nachtzug nach Lissabon” (Dorada dl film: 107 menüc; nia adaté a n publich sot ai 12 agn) y che baia dl roman che porta le medemo inom dl roman de Pascal Mercier (alias Peter Bieri). La regia é de Bille August.
I films da sëra alaleria gnará ma mostrá sce le tëmp é bel. Informaziuns sön la desdita pón ciafé sön la plata www.tessmann.it .
USP
