Scora ladina: Assegná indöt 13 posć a tëmp indeterminé
N vëndres él gnü assegné indöt dal’Intendënza ladina 13 posć a tëmp indeterminé y 37 suplënzes anuales.
Diesc posć tles scores elementares y trëi posć tles scores mesanes y altes: en vëndres ai 4 de agost él gnü surandé a Balsan tla sënta dl’Intendënza ladina 13 posć de rode y 37 suplënzes anuales por i insegnanc che á ciafé l’abilitaziun y che é inseris sön les gradatöres tles scores elementares, mesanes y altes ti comuns dla Val Badia y Gherdëna. 39 é i posć de rode assegná ti ultims trëi agn.
Dötadöm él sté poscibl da assegné 10 posć de rode a tëmp indeterminé por ci che reverda les scores elementares, 2 posć de rode a tëmp indeterminé tles scores mesanes y 1 post de rode a tëmp indeterminé tles scores altes che vëgn manajades dal’Intendënza ladina da Balsan. En vëndres ai 4 de agost él gnü assegné tla sënta dl’Intendënza ladina a Balsan diesc posć a tëmp indeterminé tles scores elementares dles valades ladines. De chisc é trëi posć fora dl organich de dërt y set dal organich provinzial suplementar. Implü él gnü assegné un dui posć de rode tles scores mesanes che reverda l’insegnamënt dl todësch y dla educaziun fisica y un n post tles scores altes che reverda le franzej. “Ti ultims trëi agn él sté poscibl da assegné indöt 39 posć de rode, chësc é n segnal de continuité important por ne garantí nia ma stabilité dla didatica por i scolars y les scolares, mo ince la segurëza profescionala di insegnanc che laora tla scora paritetica ladina”, á dit l’assessur por la scora ladina Florian Mussner. Ince por l’intendënt dles scores ladines Roland Verra él l’assegnaziun la conferma che “i sforc per assiguré la continuité educativa che vá inant y chësc é important por mantigní la cualité dl insegnamënt y dles prospetives profescionales de nosc insegnanc.”
„Cun chësc ann únse ince roé sö la gradatöra dl concurs fat l’ann 2005 por l’insegnamënt tla scora elementara y chësc portará pro da rové plü snel inant cun la gradatöra por ciafé n post de rode", dij le diretur de repartiziun Felix Ploner, che injunta en gran rengraziamënt a sües colaboradësses Claudia Aquilini y Carla Pedevilla por les scores elementares y le colaboradú Mario Tempesta por les scores mesanes y altes, che á laoré con gran profescionalité por arjunje chësc travert.
Implü él gnü surandé da pert dl’Intendënza ladina indöt 37 suplënzes tles scores dles valades ladines. I posć por les atres suplënzes gnará surandades ai 10.8 dales 9.00 tla scora mesana de La Ila diretamënter dales direziuns dles scores aladô dles gradatöres d’istitut por i insegnanc zënza abilitaziun. La scora ladina á te só organich 325,60 posć plëgns assigürés por i proscims 3 agn.
USP
