Dala Junta: Mobilité y viabilité tl zënter
Ressanamënt dla MeBo, staziun nöia a St.Jakob, Carsharing, contrat cun la SAD, ciases ANAS y recostruziun de punc a Sterzing: les dezijiuns dla Junta.
Öna dles dezijiuns plü relevantes tutes dala Junta provinziala dl Südtirol incö ai 8 d’agost é stada l’aprovaziun dl contrat de sorvisc nü cun la SAD Spa che jará en fora dal 1 de setëmber dl 2017 y ará na dorada cina tl 2024. N contrat presciapüch anfat é gnü sotescrit ince cun Trenitalia, la sozieté statala por la gestiun dl trasport de passajiers sön scines. “Da ti dé l’inciaria a döes impreses feroviares concorëntes é stada la dërta dezijiun y á ince contribuí a n aumënt dla cualité tl sorvisc feroviar local”, sotlignëia le presidënt Arno Kompatscher. Aladô dla normativa UE pó i sorvisc feroviai locai gní surandá diretamënter tres n contrat de sorvisc zënza messëi fá na gara d’apalt. Dala normativa europeica é indere na gara d’apalt scrita dant por i sorvisc dles corieres adlinfora di zëntri urbans. Di indöt 5,9 miliuns de chilometri fac vigni ann tl sorvisc local südtirolej él la SAD che nen garantësc 2,52 miliuns de chilometri y Trenitalia indöt 3,36 miliuns. “Tl dagní sarál importanc por la gestiun i criters dla contentëza di passajiers, dla cualité y dla afidabilité dl trasport sön scines”, sotlignëia l’assessur por la mobilité Florian Mussner che á porté incö tla Junta le contrat de sorvisc, elaboré dai tecnics dla Repartiziun Mobilité adöm ai rapresentanc dla SAD.
N’atra dezijiun importanta tuta dala Junta provinziala incö é l’aprovaziun de n pachet de mosöres straordinares por ressané la superstrada danter Maran y Balsan (la MeBo). I laurs é gnüs planificá aladô de n stüde de priorités fat dala Repartiziun Infrastrotöres y prevëiga trëi sorts d’intervënt. Indöt él preodü n investimënt de 40 miliuns cina le 2027, 4 miliuns por ann. Le ressanamënt dess pié ia ti pröms mëisc dl 2018. La MeBo á festejé dan da püch 20 agn da canche la strada é gnüda completada tl 1997 dal ANAS, atualmënter passél mesamënter plü co 30 mile veicui al de sön la superstrada Balsan – Maran.
Por ti garantí ai zitadins de St. Jakob a Leifers n azes plü dlungia ala linia feroviara dl Prener él la Junta che á dé süa aprovaziun ales carateristiches tecniches por na staziun nöia. “L’opera é planificada tres l’acordanza cheder 2016 – 2025 sotescrita dala Provinzia cun RFI, la sozieté dl grup Ferrovie dello Stato che gestësc la rëi statala, y á sciöche fin chël da ti pité ai pendolars y ai zitadins che vir dlungia les gran citésn’oportunité sostenibla y asvelta por arjunje le zënter o post de laur”, á sotligné l’assessur por la mobilité Florian Mussner. Do l’aprovaziun di dac tecnics gnarál sëgn a se le dé la fasa dla proietaziun en colaboraziun cun RFI. Por la realisaziun dla staziun él preodü n investimënt de 3 miliuns de euro.
Implü á la Junta provinziala ince dé pro a na convenziun cun i Comuns de Sterziung y Pfitsch por la recostruziun dl punt de Flains tl zënter dla cité de Sterzing. “Chësta mosöra é gnüda fata por adaté le punt de Flains ai laurs dla proteziun zivila che á amplié y arbassé le let dl rü Isarch”, spliga l’assessur por les strades. Le finanziamënt dla recostruziun dl punt é de 1,1 miliuns de euro che gnará spartí sö danter l'Agenzia por la proteziun zivila, la Repartiziun Infrastrotöres y le Comun de Sterzing. Tla medema zona él ince preodü la recostruziun dl punt Hofer (spëisa preodüda de 2,4 miliuns) y dl punt al azes nord de Sterzing (3,3 miliuns de euro). Löm vërda dala Junta ince por mët a desposiziun 15 ciases dl ANAS ala Repartiziun Patrimone che fajará sëgn n’analisa sön ci fá cun les ciases. “Tl caje de nezescité podará les ciases gní metüdes a desposiziun de istituziuns publiches, y sce chëstes ne á degun interés ince a privac”, spliga Mussner. Arat positif dala Junta ince por formes de contribuc por le sostëgn dl'ativité de car sharing tl Südtirol.
USP
