De dl’Autonomia, iade tla Cina, tuní y sport
De plü é stades les tematiches tratades dala Junta incö: l’istalaziun de n implant por telefoné ti tuní, le De dl’autonomia, le iade tla Cina y tröp d'ater.
Ince chësc ann vëgnel festejé ai 5 de setëmber le De dl’Autonomia por recordé l’aniversar dla firma dl’Acordanza de Paris (1946), öna dles peres miliares dl’autonomia südtiroleja. Por chësta ocajiun speziala él le Palais Widmann y le Consëi provinzial che dauriará sües portes ai zitadins por inrescí da plü daimpró sciöche la Junta, le Consëi y l’Aministraziun provinziala funzionëia. Le presidënt Kompatscher y i assessurs sará a desposiziun di vijitadus por domandes y coriosités. “L’autonomia é le früt dl laur da vigni de, sides de chi che laora pro l’aministraziun publica co ince de chi che laora por la sozieté en general. Daurí les portes ó ince dí avijiné ciamó deplü l’aministraziun y i zitadins te n’otica de trasparënza y partezipaziun”, á sotligné le presidënt Arno Kompatscher. La tematica prinzipala dl de é la solidarieté cun tröpes organisaziuns che presentará sües scomenciadies. Por informaziuns plü monüdes prëibel consulté la plata internet dedicada aposta ala scomenciadia: http://www.provinzia.bz.it/de-autonomia
Por ci che reverda les dezijiuns plü importantes dla sentada da incö ai 29 de agost él la Junta provinziala che á aprové les carateristiches techniches por l’istalaziun de na rëi d’implanc por i gesturs dla telefonia mobila ti tuní dla Provinzia por mioré la rezeziun. L’intervënt, coordiné dal Sorvisc strades dla Provinzia, prevëiga l’istalaziun de de plü rëis te 23 tuní por podëi garantí n implant a vigni gestur. I manajadus, do avëi ciafé na conzesciun plurianuala, messará spo se fistidié dla manuteziun. “L’obietif dla Provinzia é chël da sostigní n intervënt asvelt ti caji de prescia, tratan inzidënc o medefüch. Tëmp prezius che é fondamental canche ara nen vá da smendrí le risch de dagns a porsones y implanc”, spliga l’assessur provinzial por la mobilité Florian Mussner. L’istalaziun gnará planificada alado de trëi criters: la posiziun sön les strades prinzipales (SS12, SS49, SS38, yii.), le trafich mesan sön les strades y la lunghëza dles galaries. Indöt gnarál investí te chësta prozedöra 2,6 miliuns de euro.
Sön proposta dl assessur Philipp Achammer á la Junta provinziala ince aprové le pachet de mosöres “Plü movimënt y sport” che prevëiga l’aumënt dles ores de educaziun fisica tles scores todësces. “L’obietif é chël da aumenté les capazités sportives di mituns y studënc. De plü stüdi internazionai á constaté n trend negatif cun n aumënt de studënc surapëis. La scora ne pó nia fá döt da sora mo pó dé n gran contribut”, á dit Achammer. Le provedimënt prevëiga che dal ann scolastich 2018/19 gnarál aumenté les ores de sport a 102 ores anuales tla pröma elementara y a 68 ores anuales dala secunda ala cuinta elementara y dala pröma ala terza mesana. Tl pachet de mosöres él ince preodü campagnes de sensibilisaziun cun atlec südtirolej sciöche testimonials. Implü él ince preodü le reconescimënt dles ativités sportives fates aldinfora dl orar scolastich sciöche pert dl orar de scora. La Junta á ince aprové la nominaziun di trëi componënc dl Consëi dla Fondaziun dl Zënter cultural Euregio Gustav Mahler de Toblach che ará l’inciaria por cater agn. Al se trata de Ursula Stampfer, Josef Fauster y Elisabth Wieser. Sciöche revisur di cunc él gnü indiché Patrick Bergmeister. Dal pröm de jená dl 2018 sará l’ativité dl Zënter cultural de competënza dla Fondaziun.
Le presidënt Arno Kompatscher á ince anuzé la conferënza stampa por fá n pice ressumé sön le iade tla Cina cun na delegaziun de imprenditurs südtirolej. Tratan le iade él gnü a se le dé de plü incuntades cun rapresentanc dla politica, dl’aministraziun y dl’economia dl Paisc che organisará tl 2022 i Jüc olimpics da d’invern. Al é gnü segnalé dai responsabli cinej dl’Area dl Minister dl comerz y dl Minister dl sport l’interes da lauré adöm cun les aziëndes südtirolejes dantadöt por ci che reverda le setur dl sport da d’invern: implanc de produziun de nëi artifiziala, atrezadöres, iac dala nëi, proietaziun y sistems de gestiun de raiuns dai schi, ticketing y tröp d’ater. “Al podess gní a se le dé na colaboraziun nia ma por i jüc olimpics mo ince por le tëmp daldô, ponsan che les disciplines sportives da d’invern é tres plü praticades dai cinej, dantadöt por ci che reverda le jí cui schi”,dij Kompatscher. I proscims vari sará insciö la creaziun de na plataforma por le pool d’aziëndes locales interessades al marcé cinej, l’organisaziun de n iade tl Südtirol de na delegaziun cineja, la formalisaziun de n’acordanza danter le NOI Techpark de Balsan y l’Innovation Technology Park de Pechino, la formaziun di maestri dai schi y de d’atres figöres profescionales. “I sun sigü che le laur fat cina sëgn pois porté de bugn früc nia ma al turism mo a döta l’economia locala”, á dit Kompatscher.
USP
Galaria dales fotografies
(Foto Fiera Bolzano)
