De dl’Autonomia: Solidarieté y reconoscimënt
Le presidënt Arno Kompatscher á inaudé incö ai 5 de setëmber le De dl’Autonomia. La tematica zentrala de inann é stada la solidarieté.
Dales 10.00 él sté le Palaz Widmann che á daurí les portes ai zitadins tratan le De dl’Autonomia che vëgn zelebré vigni ann ai 5 de setëmber (data dl’acordanza Gruber-Degasperi) y che chësc ann ti é dediché ala solidarieté. Tratan l’inauguraziun él le presidënt Arno Kompatscher che ti á dé le begnodü a düc chi che ó s’informé y vijité i ofizi provinziai cina les 18 da sëra. Kompatscher á recordé che “l’autonomia ne é nia conzepida por se instëssa, ara ne é nia di politics, mo ara é n stromënt por le svilup dl teritore y por le svilup dla sozieté y che nes pormët da costruí na sozieté plü solidala.”
Tratan le De dl’Autonomia incunta la Provinzia la popolaziun por mostré i 3 conzec de solidarieté dla Provinzia: “Le pröm é la solidarieté direta di südtirolej por i südtirolej, chël ó dí les prestaziuns ti seturs desvalies a bëgn de chi che vir te situaziuns de dificolté”, á splighé Kompatscher: 1,7 miliarg de euro tl bilanz provinzial é destiná ai sorvisc soziai y sanitars, n miliard ala formaziun y cultura, 500 miliuns ai Comuns, prësc 200 miliuns al smendrimënt dla presciun fiscala. Danter chisc sorvisc de solidarieté direta á le Presidënt recordé i 573 miliuns spartis sö aladô de assëgns de cura, mosöres por la familia, sostëgn ales porsones cun handicaps, dërt al stüde yii. “I contribuënc pó ester gaierc de ci che ai fej por nosta tera”, á dit Kompatscher.
Le secundo livel de solidarieté é chël dla cooperaziun internazionala aldinfora di confins locai: “Aldedaincö él fondamental da ti dé ales porsones prospetives futures söl le post olache ares vir. Chësc é le dër percurs por afronté i fenomens de migraziun cun l’impëgn a se daidé instësc”, á costaté Kompatscher. Le terzo livel de solidarieté, dlungia al sistem de proteziun zivila atif tles emergënzes regionales, reverda chël dl finanziamënt de 40 miliuns de euro al ann por proiec de svilup ti Comuns de confin dles Regiuns confinantes, sön la basa dl’Acordanza de Milan. Ala zerimonia él ince sté presënt le deputat Roger De Menech, presidënt dl Fonds Comuns de confin. Menech á rengrazié a inom dl Govern y á recordé che “cun le fonds á la Provinzia de Balsan svilupé n model basé sön solidariete, responsabilité y relaziuns, che presentëia sü bugn conzec ince tles arees vijines. N’aziun che pormët da realisé proiec che renforzëia l’identité teritoriala.” Le presidënt Arno Kompatscher á recordé por l’ocajiun ince l’importanza dl volontariat che é öna dles fondamëntes dla sozieté. En rapresentanza de düc i volontars á Franco De Giorgi dl’assoziaziun “Doturs tl Südtirol por le monn” recordé che Balsan é stada la pröma Provinzia cun na lege, n regolamënt y n budget sön la cooperaziun internazionala y á rengrazié la sensibilité di politics y la generosité di zitadins.
Tl contest dl De dl’autonomia dediché ala solidarieté él sté presënta ince la WFTO (World Fair Trade Organisation), na rapresentativa de sura 400 assoziaziuns de 79 Paisc che sostëgn le comerz fair y di pici produturs tles arees svantajades dl monn y che suranda reconoscimënc a ënc locai. Incö ai 5 de setëmber é la Provinzia gnüda premiada dala WFTO cun le reconoscimënt “Provinzia valia y solidala”. L’onoranza é gnüda surandada da Rudi Dalvai, le presidënt dla WFTO.
USP
Galaria dales fotografies
