Catalonia, Kompatscher preocupé por la situaziun
Le presidënt Kompatscher definësc “daldöt inazetabel” le comportamënt dl guern spagnol ti confrunc dla Catalonia.
Le presidënt dla Provinzia, Arno Kompatscher, tól posiziun por ci che reverda i avenimënc tla Catalonia. Aladô de Kompatscher é la situaziun atuala la conseguënza dl fat che por agn á la Spagna refodé da daurí na tratativa rajonora y concreta sön le svilup dl’autonomia tla regiun. “L’autonomia finanziara catalana – spliga le presidënt dla Provinzia – esist ma sön le papier, y le govern zentral ne é nia desponibl, do mia minunga te na manira nia da capí, da atué n’acordanza eculibrada sön chësta tematica.”
Kompatscher arata inant che “le comportamënt atual dl guern spagnolo é daldöt nia azetabl tl confrunt di rapresentanc dles istituziuns autonomes catalanes” y le presidënt paridlëia la situaziun atuala cun chëra dl Südtirol ti agn ’50, “canche la Talia se refodâ da ti conzede al Südtirol l’autonomia che ti ê stada impormetüda”. Tla Provinzia de Balsan – á ajunté le Landeshauptmann – “él impó sté meso por merit dl ancoraje internazional garantí dal’Acordanza de Paris y dala funziun de proteziun dl’Austria da ciafé na soluziun che acontentëia, mo impormó do tratatives lungies y ries”. Aladô de Kompatscher “ne á la Catalonia nia chëstes formes de sconanza, mo chësc ne ti pormët nia ala Spagna da ignoré sües ghiranzes: ince te chësc caje dess le prinzip dl “Pacta sunt servanda” gní garantí. Mia aodanza y mia speranza é che chësc conflit danter le guern spagnol y le grup linguistich catalan pois gní stlarí te na manira positiva.”
USP
