Dala Junta: Termes de Maran, convenziun y refodam spezial
La Junta provinziala á dé süa aprovaziun al’estinziun dl imprëst dles Termes, ala convenziun cun les tliniches dl Tirol y al ajornamënt dl plann dl refodam.
La Junta provinziala á aprové incö ai 26 de setëmber l’estinziun dl imprëst dla Terme Maran Spa che foss scadü tl 2018: la Provinzia smendrësc la dorada paian 4,7 miliuns de euro cun chi che ara se garantësc le 98,89 porcënt dles aziuns dla sozieté inhouse dles Termes. “En pratica é les termes sëgn zënza debic y implü vëgnel ince confermé la buna sajiun cun i cosć de gestiun che vëgn curis dales entrades y dai sorvisc. Implü él ince poscibl da investí tla manutenziun y te de pici intervënc”, á referí le presidënt Arno Kompatscher tratan la conferënza stampa do la sentada dla Junta provinziala. Por ci che reverda i gragn investimënc tla strotöra á Kompatscher recordé che l’ampliamënt dla strotöra é garantí da n contribut finanziar straordinar de 2,5 miliuns de euro dal Comun de Maran.
Surapró á la Junta provinziala ince renové la convenziun trienala cun les tliniches tirolejes che romagn insciö n punt de referimënt dantadöt por ci che reverda le zënter de traplantaziuns. L’acordanza cun le Land Tirol por l’assistënza de paziënc che vëgn dal Südtirol jará en forza al 1 de jená dl 2018 y é gnüda elaborada dal’assessuria provinziala por la sanité Martha Stocker. Al fej pert dles strotöres convenzionades la tlinica universitara de Desproch , l’ospedal general de Hall tl Tirol y l’ospedal de Hochzirl – Natters. L’acordanza sará de trëi agn y prevëiga prestaziuns por n valur de 17 miliuns d euro. “Cun chësta dezijiun unse confermé che le zënter de referimënt por düc i traplanc, ince dl Südtirol, é chël de Desproch che é n zënter dër cualifiché”, á dit l’assessuria Stocker.
Implü á la Junta provinziala ince ajorné incö le plann provinzial dl refodam por ci che reverda la gestiun dl refodam spezial. “Le plann presentëia te na manira detaiada i movimënc de döt le refodam dles ativités produtives söl teritore provinzial; al ne se trata nia de refodam particolar sciöche an podess ponsé deache ai á inom 'speziai'”, á splighé l’assessur por l’ambiënt Richard Theiner. L’ajornamënt porta ince para na modernisaziun adatan les prozedöres ala tecnica por le tratatmënt de düc i refodams che vëgn dales ativités produtives, mo ince por ejëmpl dai paltans y dales maltes de depuraziun, dal refodam de costruziun, de demoliziun y ince sanitar. “Na prezisaziun importanta é che sön na produziun de zirca 1,7 miliuns de tonelades de refodam (200mile tonelades de refodam urban), nen él zirca 1,5 miliuns de tonelades che vëgn recuperades. Chësc pormët da recuperé l'80 porcënt dl refodam y chësc é n standard dër alt ince a livel europeich”, insciö Theiner.
La Junta provinziala á ince aprové n pachet de mosöres por 4,7 miliuns de euro por mioramënc strotorai tla Val Martell. Al reverda operes sciöche le coliamënt ala vëta leria, canalisaziuns y dui implanc de depuraziun biologica dles eghes, coliamënt ala rëi eletrica publica y ala rëi idrica cuntra i medefüc. N ater punt aprové dala Junta é sté le plann trienal por investimënc ambientai dles zentrales de Sarnthein y de Lappach por n investimënt de 3,2 miliuns de euro.
USP
