Ferates da record d’agost, sura 839mile passajiers
Al vá inant le trend positif dles ferates tl Südtirol: ma tl mëis d’agost él gnü registré 839mile passajiers, l’aumënt plü alt é gnü registré tla Val de Puster.
Al ne é mai ciamó sté tan tröc passajiers d’agost sön les ferates dl Südtirol co tratan le mëis d’agost da inann: chësc vëgn comuniché dal Departimënt Mobilité dla Provinzia de Balsan cun indöt 839.101 passajiers cun n aumënt de 14mile obliteraziuns tla staziuns dles ferates tl Südtirol en confrunt ala medema perioda dl ann da denant. “Chësc resultat desmostrëia che al é tres de plü porsones che adora la ferata por se möie tratan le tëmp lëde y ince tratan les vacanzes. Chësc svilup é la basa ince por lauré inant por sposté la mobilité sön scines cun investimënc te tröc proiec che vá dala cumpra de ferates nöies cina al adatamënt dles staziuns”, comentëia l’assessur por la mobilité Florian Mussner.
Tla Val de Puster él gnü registré l’aumënt plü alt
Na seria de dac dër positifs por ci che reverda l’aumënt dles obliteraziuns é gnü registrá tla Val de Puster. La linia feroviara che coliëia Fortëza cina Sanciana á fat registré n aumënt de +8 porcënt, cun ince n aumënt cina de +14 porcënt a Bornech Nord y de 13 porcënt a Toblach. A livel teritorial él ince gnü a se le dé aumënc tla Val d’Isarch y tl’Alta Val d’Isarch (+3 porcënt) y la linia dles ferates Maran – Balsan (+2 porcënt), cun les staziuns de Vilpian y de Siebenaich che á fat registré i resultac plü alc. Tl Südtirol él les zifres plü altes normalmënter ti mëisc de ma y otober: i recorc plü alc é de 956mile obliteraziuns de otober dl 2015 y de 941mile obliteraziuns de ma dl 2017.
USP
