Ander dles Conturines, archif dl’clima, conferënza ai 6 d’otober
Da agn él Christoph Spötl che analisëia l’Ander de Conturines sciöche archif dl’clima. Ai 6 d’otober gnarál presenté i resultac.
L’ander de Conturines a 2.800 metri d’altëza tla Val Badia é conesciü deache an á ciafé tl 1987 restli de n schelet dla laurs preistorica di andri tlamé Ursus ladinicus. Mo l’ander é ince dër prezius por podëi analisé la richëza de minerals y de concreziuns da cialc, dantadöt tla pert plü interna dl ander.
Analisé y descurí les informaziuns prezioses custodides te chisc minerals y te chëstes peres é sté le fin de n team internazional de geologs coordiná dal professur Christoph Spötl dl Istitut de geologia dl’Université de Desproch.
I geologs cun a cé Spötl á insciö perforé i strac de deposiziuns de minerals cina trëi metri por fá spo les analises nezesciares. Por de plü agn á i geologs ince studié le microclima dl ander por capí damí porciodí che al ne se formëia nia plü concreziuns y porciodí che chëres esistëntes scomëncia da se desfá. En vëndres ai 6 d’otober presentará Christoph Spötl i resultac de sües inrescides te na conferënza (por todësch) dales 21.15 tl salf dles manifestaziuns J.B.Rinna a San Ciascian. La conferënza vëgn organisada dal Museum Ladin y é coliada ala mostra “Le monn misterius dl anders tles Dolomites”. L’entrada é debann y por l’ocajiun y él ince poscibl da vijité la mostra.
USP
