Pröma sentada dla Consulta culturala provinziala
Sciöche preodü dala lege por la cultura nöia él les trëi consultes di grups linguistics che s’á incunté por le pröm iade te na sentada deboriada a Balsan.
Lauré deboriada ai orientamënc culturai dl dagní, svilupé na rëi de colaboraziun y porté inant les ghiranzes comunes cun na usc sora: chisc é i obietifs prinzipai dla Consulta culturala provinziala che s’á incunté ai 11 d’otober por le pröm iade a Balsan. La sentada dla Consulta é gnüda daurida dal assessur por la cultura ladina Florian Mussner adöm a sü colegs Christian Tommasini y Philipp Achammer. I fins prinzipai dla Consulta culturala provinziala é chël da aconsié la Junta provinziala te domandes che reverda l'orientamënt cultural-politich de düc trëi i grups linguistics y da cherié na rëi de colaboraziun inanter les trëi Consultes culturales ladina, todëscia y taliana.
“L’istituziun dla Consulta culturala provinziala é n vare important por afronté les tematiches culturales düc i trëi grups linguistics adöm, dantadöt por ci che reverda les tematiches che reverda düc trëi i grups de rujeneda”, á dit l’assessur Florian Mussner. La diversité dles cultures ladina, todëscia y taliana ne é nia na sfidada mo n ocajiun da se baraté fora y da dé impulsc un cun l’ater por renforté les identités culturales dl Südtirol, insciö Mussner. Vizepresidënt y assessur ala cultura taliana Christian Tommasini á recordé che la cultura y la formaziun é i dui valurs fondamentai por la coejiun soziala y dëida da scombaté la tëma da se confronté cun d’atres cultures. Le Südtirol sciöche tera amesa l’Europa pó chiló ester d’ejëmpl pro la promoziun dl plurilinguism y de incuntada danter les cultures.” L’assessur Philipp Achammer á sotligné che al é “sté na ghiranza prezisa da istituí la Consulta nöia tres la lege provinziala sön la cultura por cherié na paladina de colaboraziun y de barat d’idees. Incuntades tl respet dles diversités mo che anuzëia i valurs desfarënc é dër importantes. Deache sce la cultura se presentëia te na manira unica, ára plü forza”, insciö Achammer.
Düc i mëmbri y i argomënc dla sentada
Do les parores de salüd di assessurs él vigni comëmber che s’á presenté singularmënter por passé dedo ala debatüda sön i argomënc che reverda i punc de fora dl panorama cultrual südtirolej, les sfidades por le svilup cultural tl dagní, la creaziun de n svilup responsabl y vijiuns desvalies por les generaziuns che vëgn docá. Dla consulta cultruala fejel pert por la Consulta culturala ladina Hubert Irsara, Lois Ellecosta, Christa Kasslatter y Bruno Senoner. I rapresentanc dla Consulta culturala todëscia é Helga von Aufschnaiter, Pepi Fauster, Klaus Runer, Erich Deltedesco, Georg Mühlberger, Albert Willeit, Sabine Gamper, Klaus Peter Hartig, Doris Brunner, Eva Gratl, Günther Oberhollenzer, Anton von Walther, Kunigunde Weissenegger y Toni Bernhard. Por la Consulta culturala taliana él ala pert Marisa Giurdanella, Luca Barbieri, Marco Bernardi, Luca Bizzarri, Frida Carazzato, Patrizia Donadio, Pio Fontana, Adel Jabbar, Alessandra Limetti, Emanuele Masi, Barbara Nesticò, Luca Sticcotti, Federica Viganò, Beate Christina Weyland y Andrea Zeppa.
USP
