Tosc Wikipedia ince por ladin, le proiet é pié ia
Le pröm vare por avëi Wikipedia tosc danman ince por ladin é gnü fat. Le proiet y le percurs é gnüs presentá ai 12 d'otober a Balsan da pert di organisadus.
La digitalisaziun de contignüs culturai é na tematica tres plü atuala a livel global. Le portal de Wikipedia é la enziclopedia digitala plü adorada al monn y é n referimënt global por la documentaziun en cunt de vigni ciamp dl savëi. Dantadöt les generaziuns nöies chir tla rëi internet informaziuns en cunt de vigni sort de contignüs y se dá jö tres deplü cun les tecnologies digitales y multimediales. Porchël taca le svilup dla cultura dassënn adöm ince cun süa presënza tla rëi internet.
Le proiet de na Wikipedia ladina strotorada y autonoma a livel paritar respet ai atri lingac é de gran valüta por sostigní n lingaz de mendranza, dantadöt aladô dla gran visibilité che i contignüs por ladin ciafa tres la presënza te Wikipedia. Le proiet é incö ai 12 de otober gnü presenté dala coordinadëssa dl proiet Susy Rottonara, dal intendënt Roland Verra y dai esperc de Wikipedia Christian Cenci de Trentino Alto Adige Wiki y Gian Francesco Esposito de Wikimedia Italia, che á ciarié i tesć por ladin sön Wikisource tl proiet INTERREG. Entrami dëida porté inant tecnimënter l’incubator dla Wikipedia Ladina.
La Wikipedia Ladina é al momënt te n “incubator” de Wikimedia da ciafé sot a: https://incubator.wikimedia.org/wiki/Wp/lld/Plata_prinzipala
Pornanche al gnará curí dötes les tematiches dades dant cun contignüs aladô gnarára metüda online. La costituziun de na Wikipedia ladina ti dá prestije al lingaz y ala cultura ladina a livel mondial y porta pro a süa sconanza y a süa valorisaziun. La coordinadëssa dl proiet Susy Rottonara á metü a jí l’iniziativa aladô dl laur te n proiet INTERREG te na fasa de svilup, tres chël che al é gnü ciarié sön Wikisource tesć de leteratöra ladina ti idioms ladins da esperc de Wikimedia por svilupé itinerars culturai y didatics tla natöra dantadöt sön la tematica dles liëndes ladines. Le proiet de Wikisource é da ciafé sot a: https://it.wikisource.org/wiki/Categoria:Testi_in_ladino
I contignüs dla Wikipedia Ladina gnará scric ti idioms ladins y dess insciö testimonié n lingaz y na cultura ladina vis. Al vëgn insciö pité la poscibilité de na partezipaziun intlusiva a livel interladin da pert de düc i interessá a dé ite contignüs desvalis. Wikipedia é na enziclopedia lëdia a chëra che al po tó pert düc i interessá cun le laur volontar, insciö che al po gní arjunt l’obietif de na colaboraziun dër ampla a livel cultural sciöche proiet interladin che se svilupará sön deplü agn.
Le laur de svilup dla Wikipedia Ladina piará ia cun contignüs che reverda diretamënter la cultura ladina y sües tematiches caraterisantes. Porater jarara debojëgn che al vëgnes ince dé ite contignüs por ladin che reverda le savëi global aladô de na lista de tematiches che dess gní dant te vigni Wikipedia, a na moda che la Wikipedia Ladina pois arjunje l’obietif da ester reconesciüda daldöt autonoma.
Le proiet dla Wikipedia Ladina é sostigní dal Departimënt Educaziun y Cultura Ladina y gnará porté inant dal’Intendënza Ladina adöm cun les scores ladines, insciö che i scolars y les scolares pois tó pert ativamënter al svilup dla Wikipedia Ladina.
La Lia Culturala Fanes fej para por ci che reverda i contignüs dles liëndes ladines, che é na tematica caraterisanta dla Wikipedia ladina, ince a sostëgn dl prozes de candidatöra dles liëndes ladines sciöche avëi imaterial UNESCO. Proscimamënter gnarál metü a jí incuntades informatives tles valades ladines cun la presënza de esperc de Wikipedia por porté dant i detais dl proiet y cun l’obietif da formé na comunité wikipediana ladina che se dais jö ativamënter cun le svilup dla Wikipedia Ladina.
USP
Galaria dales fotografies
