Repartiziun Inovaziun, Vito Zingerle é le diretur nü
La Junta provinziala á nominé Vito Zingerle sciöche diretur nü dla Repartiziun Inovaziun, Inrescida y Université impede Maurizio Bergamini.
Stlüt jö le tëmp de Bergamini, mëtel man le tëmp de Zingerle. Les ultimes edemes â Maurizio Bergamini lascé da ester, do 23 agn tl'aministraziun provinziala, a ce dla Repartiziun Inovaziun, Inrescida y Université por jí en ponsiun. Da incö (17 de otober) é l’inom de so sostitut ofizial: al é Vito Zingerle, 47 agn, che é sté i ultimi 12 agn diretur dl Museum Natöra dl Südtirol. Zingerle ê gnü detlaré adaté, adöm cun ciamó dui candidac, dala comisciun che á coordiné la prozedöra de seleziun. La dezijiun definitiva é gnüda tuta incö danmisdé dala Junta provinziala, che á chirí fora Vito Zingerle. "La Repartiziun Inovaziun rapresentëia tres deplü na strotöra importanta dl'aministraziun provinziala – sotrissëia le presidënt y assessur por l’economia Arno Kompatscher – ajache i seturs che al á le dovëi da coordiné é importanc por le svilup dl'economia dl Südtirol".
La Repartiziun Inovaziun, Inrescida y Université manajëia vigni ann n budget de zirca 80 miliuns de euro, "20 de chisc - ajunta le diretur de Departimënt Ulrich Stofner – é preodüs por les mosöres de sostëgn dles impreses, ciamp olache la Provinzia da Balsan á fat tröc vari inant ti ultimi agn". Le medemo vel ince por l’inrescida scientifica, olache al é gnü lauré fora n proiet de chersciüda che avisa Zingerle messará realisé y svilupé. L'ater ciamp d’aziun dla Repartiziun é ala fin rapresenté dal'université y dai istituc d’inrescida, cun le finanziamënt y le coordinamënt dles convenziuns cun istituziuns y ënc che laora sön le teritore.
USP
