Parcs naturai, intervënc do le bur’ tëmp da d’isté y manutenziuns
Aprovaziun de de plü intervënc por 475 mile euro por parcs naturai: manutenziun y costruziun de operes nöies do i dagns dal ri tëmp da d’isté.
Sön proposta dl assessur provinzial por l’ambiënt Richard Theiner á la Junta provinziala aprové tla sentada di 24 d’otober n investimënt de 475 mile euro por investimënc straordinars y de prescia ti parcs naturai. Te tröc caji é chisc intervënc stá debojëgn por gauja dl bur’ tëmp dl isté 2017, te d’atri caji él gnü fat intervënc de manutenziun ordinara. Les mosöres reverda sides i parcs naturai che ince la zona sot a sconanza de paesaje sön Munt Suc.
Parch natural Pöz-Odles
Na soma de 65 mile euro é a desposiziun por laurs straordinars tl Parch natural Pöz – Odles. Tl contest dl parch te Gherdëna reverda i laurs i raiuns de Stevia, Col dla Pieres, Forcela Pita y Val di Chedul y ince tl’area dlungia l’ütia da munt Puez-Pöz (por n investimënt de 55 mile euro). Implü él ince preodü laurs straordinars sön Col Pradat por n investimënt de 10 mile euro. Chisc laurs gnará fac dal Ispetorat dla Forestala da Bornech. En ajunta él ince preodü laurs de manutenziun te döt le parch natural por ci che reverda les sëmenes, i punc d’informaziun y de palsa y laurs pro les tofles por n import complessif de 70 mile euro.
Parch natural Fanes-Senes-Braies
Ince tl Parch natural Fanes-Senes-Braies él preodü de plü intervënc de reparaziun di dagns dl bur’ tëmp por n investimënt de indöt 30.000 euro te de plü localités. Implü vëgnel ince metü a desposiziun na soma de 70 mile euro por d’atri intervënc de manutenziun.
Parch natural Scilier Ciadenac y zona de sconanza dl paesaje Munt Suc
Na seria de intervënc de manutenziun gnará ince fac tl Parch natural Scilier – Ciadenac por n import de 100 mile euro. Tla zona de sconanza dl paesaje de Munt Suc él ince preodü laurs de manutenziun por n investimënt de 70 mile euro.
Parch natural Trëi Pizes de Lavarëi y Parch natural “Texelgruppe”
Ince ti parcs naturai de Trëi Pizes de Lavarëi y Texelgruppe gnarál investí por ressané i dagns fac dales plöies y dales smöies dl 2017. Chiló él preodü na soma de indöt 70 mile euro sciöche investimënc straordinars.
USP
Galaria dales fotografies
