Migraziun tl Südtirol: statistiches atuales
Aladô dla relaziun anuala sön la migraziun presentada incö viôl tl Südtirol ala fin dl 2016 indöt 46.794 porsones forestes, le 8,9 porcënt dla popolaziun.
La relaziun anuala “Dossier statistico immigrazione 2017” contëgn na seria de statistiches y dac sön i movimënc de migraziun de porsones forestes tl Südtirol y tla Talia, cun dac interessanc che reverda ince i seturs dla scora, dl’economia y tröp d’ater. La relaziun vëgn realisada vigni ann dal Ofize statal cun les descriminaziuns raziales (UNAR) y é gnü presenté incö ai 26 d’otober a Balsan dal assessur por l’integraziun Philipp Achammer, da Federica Dalla Pria dla Fondaziun Alexander Langer y da Karin Girotto dla Cooperativa Savera.
L’assessur Achammer á sotligné che propi por ci che reverda le fenomen dla migraziun él fondamental da podëi analisé la situaziun aladô de dac y statistiches y spo lauré sön les mosöres. I lingac, la formaziun y le laur é trëi pilastri fondamentai por avëi n’integraziun che garetes, insciö Achammer. “I messun sostigní le prozes da imparé i lingac, mo i messun ince le pretëne”, dij Achammer. Implü él debojëgn de de majeri sforc canche ara nen vá dl arbandon scolastich y de formaziuns spezifiches sön le marcé dl laur por ti dé na prospetiva ales porsones che röia adalerch, dij Achammer.
Migraziun tl Südtirol
I dac che fej referimënt ala fin dl ann 2016 dij che te chë perioda viôl tl Südtirol 46.794 zitadins foresć tl Südtirol (8,9 porcënt dla popolaziun generala), tl Trentin nen êl 46.456 (8,6 %) y tl Bundesland Tirol 111.626 (15 %).
Le raport cun l’ann da denant dij che al é gnü a se le dé n aumënt de 340 porsones, che vëgn calcolé dal saldo negatif dla migraziun (-294) en confrunt al saldo dles nasciüdes (+634).
Por ci che reverda la popolaziun foresta él da registré la porcentuala plü alta dl ses feminin (53,1%), mo al é da segnalé che al é de gran desfarënzies de ses danter les nazionalités.
Söporjö n terzo dla popolaziun foresta vir a Balsan (15.315 zitadins), na gran pert vir a Maran (6.352) a Porsenú (2.117), a Laives (1.613) y a Bornech (1.506).
Dui terzi dles porsones forestes vëgn da d’atri Paisc europeics: indöt él 15.628 porsones che vëgn da d’atri stac europeics, 14.469 da paisc dl’Europa dl Est (che ne fej nia pert dl’UE), y 197 da d’atri paisc dl’Europa. Le plü gran grup vëgn dal’Albania cun 5.332 porsones, spo 4.373 dai Paisc Todësc, 3.446 dal Marocco, 3.366 dal Pachistan y 2.985 dala Romania. Indöt virel tl Südtirol zitadins che vëgn da 135 paisc dl monn.
Di indöt 81.254 mitans y mituns dles scolines y scores dl Südtirol nen él 9.174 che á na zitadinanza foresta, 2.295 de chisc vá tla scolina, 3.410 tla scora elementara, 1.850 te na scora mesana, 1.619 te na scora alta. 172 mitans y mituns frecuentëia na scolina o scora ladina, 4.609 na scolina o scora todësca y 4.392 na scolina o scora taliana.
54 mitans y mituns cun na zitadinanza foresta frecuentëia na scolina ladina (7,9 porcënt), 72 fej na scora elementara tles valades ladines (5,9 porcënt), 33 na scora mesana (4,6 porcënt) y 13 na scora alta (2,7 porcënt). Les porzentuales é te düc i livi scolastics i plü basc en confrunt ales scores y scolines todësces y talianes.
Tl Südtirol él indöt 3.873 firmes registrades sön proprietars foresć.
Dles indöt 176.523 muciadësses y muciadus che é rová tla Talia cina la fin de merz dl 2017 nen él demanco co öna na porzentuala (1.504) che é tl Südtirol.
Migraziun tla Talia
Ai 31 de dezëmber dl 2016 viôl te döta la Talia indöt 5.047.028 zitadins foresć (cun n aumënt de 20.875 dal ann passé), de chisc é 3.509.805 zitadins che ne vëgn nia dal’UE. Implü röiel lapró 206.866 porsones, che á n’autorisaziun de sojornanza, mo che ne é nia ciamó registrades tl ofize anagrafich. Dötadöm é le numer dles porsones forestes che vir regolarmënter tla Talia 5.359.000. N dat interessant é che plü o manco le medemo numer de porsones, 5.383.199, é i zitadins talians che vir foradecá.
Le numer di muciadus che é rová tla Talia dal Mer Mediteran é de indöt 181.436 porsones (dl 2015 nen él sté 153.842). Jogn y jones nia acompagná nen él indöt rové adalerch 25.843, de chisc é 6.561 nia plü da ciafé. Por ci che reverda le numer de domandes de asil é la Talia al cuinto post al monn, do i Paisc Todësc, i Stac Unis, la Turchia y l’Africa dl Süd.
USP
