Atrezadöra por i auti y veicui: s'arjigné ca por l'invern
Dai 15/11 sará l'oblianza dl'atrezadöra da d'invern sön l'A22 varënta. Sön les strades provinziales é l'atrezadöra damanada ti caji de nezescité.
„I montli da d’invern o les morones por la nëi é indespensables, porchël dess ince düc i autisć y les autistes se atrezé por l’invern y daidé da aumenté insciö ince la segurëza sön strada“, sotlignëia le diretur dla Repartiziun Sorvisc Strades Philipp Sicher. L'Ofize Motorisaziun dla Provinzia recorda che dai 15 de otober ál metü man la fasa de passaje dal’atrezadöra da d’isté a chëra da d’invern che gnará stlüta jö ai 15 de novëmber. La Motorisaziun recorda che i auti y i veicui che zircolëia sön les strades dla Provinzia mëss ester atrezá cun montli da d’invern o morones ti caji de nëi y/o la formaziun de dlacia sön strada, belanfat te ci perioda o mëis dl ann.
Sön l’autostrada dl Prener vel l’oblianza dl’adoranza di montli da d’invern o dles morones te auto tresfora belanfat cares che é les condiziuns dl meteo dai 15 de novëmber ai 15 de aurí. Sce les condiziuns dla strada le ghira, spo mëss i autisć mët sö les morones.
„I montli da d’invern garantësc por merit de süa consistënza plü aderënza sön strada canche les temperatöres é basses cun ince le tru da archité che vëgn plü pice y cun plü stabilité sön strada“, spliga Markus Kolhaupt dl Ofize Motorisaziuns dla Provinzia. „Por avëi na buna aderënza sön na strada da nëi él aconsié da avëi montli nia plü vedli de cater agn y cun na profondité minima dl „battistrada“ de almanco cater milimetri“, insciö Markus Kolhaupt.
Por de plü informaziuns tliché chiló.
USP
