Les dezijiuns plü importantes dla Junta provinziala
De plü é stades les dezijiuns dla Junta: aprovaziun dl program planivolumetrich dl Techpark a Bornech, dl fonds sanitar integratif y de na convenziun cun la LUB
Cun i 5 de novëmber él les Postes talianes SPA che metará man cun le sorvisc da partí fora la posta ma plü vigni dui dis te 12 regiuns y te 500 comuns, en atuaziun dla delibera AGCOM (Autorité por les garanzies tles comunicaziuns) che prevëiga che la posta vëgnes dada jö vigni dui dis ti comuns cun manco de 200 abitanc por chilometer. Chësta mudaziun foss ince gnüda atuada te 26 comuns dl Südtirol, dantadöt tla Val de Puster y tla Val Badia. “Mo chësta mosöra ne gnará nia atuada tl Südtirol, deache la Provinzia á fat n’acordanza cun les Postes talianes bele d’aurí y che prevëiga che al vëgnes dé fora la posta vigni de dl’edema y ince la sabeda i foliec. Al gnará garantí la continuité zënza limitaziuns”, á splighé le presidënt dla Provinzia Arno Kompatscher do la sentada dla Junta. La Provinzia metará a desposiziun, aladô dl’acordanza, les ressurses finanziares. Implü él gnü scrit fora 25 posć por postins.
Implü á la Junta provinziala ince aprové incö le fonds sanitar integratif por i dependënc publics “SaniPro” y ince le statut dl’Assoziaziun. “Chësc fonds nü é söporjö le medemo de d’atri fonds bele atifs por ejëmpl por artejans o dependënc dles banches. Al é ince gnü a se le dé incuntades cun d’atres categories por cherié n fonds deboriada y insciö miú marcé por düc”, á dit le presidënt dla Provinzia Arno Kompatscher. L’assessuria por le personal Waltraud Deeg á ajunté che “chësc fonds sanitar é n vare fondamental por cherié na prestaziun de previdënza integrativa por nüsc dependënc”. Al gnará scrit ite te na manira automatica tl fonds sanitar integratif düc i dependënc dla Provinzia, dla sanité, di Comuns, dles Comunités raionales, dl’Assoziaziun dles ciases de palsa, dl IPES y dles Aziëndes de sojornanza de Balsan y Maran che á n contrat a tëmp indeterminé o a tëmp determiné por almanco un n ann. Al se trata de indöt 42.166 lauranc. Le datur de laur paiará na cuota de 125 euro al ann por vigni dependënt.
La Junta provinziala á ince aprové incö le program planivolumetrich dl NOI Techpark de Bornech, che dess deventé n zënter spezifich tl setur dl Automotive sön na spersa de 4mile metri cuadrac. La daurida dess ester tl 2021. Dl’atuaziun dl plann volumetrich y dla gestiun dl proiet se fistidiëia la BLS (Business Location Alto Adige Südtirol). Le proscim vare sará l’elaboraziun de n proiet de fatibilité adöm cun le Comun, indöt él preodü n investimënt de 26 miliuns de euro che gnará finanziá dal fonds europeich de coejiun.
N’atra dezijiun importanta dla Junta provinziala é stada l’aprovaziun dla convenziun trienala danter la Provinzia y l’Université Lëdia de Balsan por amplié la colaboraziun tla formaziun de educadus y insegnanc, tl aprendimënt permanënt y tla sconanza dles plantes. Al gnará istituí 3 plataformes formatives y scientifiches. Te chisc zëntri de competënza fejel para ince la facolté de design y ert, sciënzes dla formaziun, sciënzes y tecnologies dla LUB y ince ofizi y ënc dla Provinzia. Al é ince preodü na plataforma de sconanza dl patrimone cultural y dla produziun culturala che prevëiga le coordinamënt de scomenciadies y de archirides tl contest dl’Euregio.
La Junta provinziala á ince ratifiché n program de intervënc por l’ambiënt por 1,1 miliuns de euro por Comuns de Barbian, Ciastel, Laion y Pruca.
USP
