DoloMystic: pest spezial Unesco a Günther Pitscheider
Le davagnadú dl concurs fotografich DoloMystic y dl pest spezial Fondaziun Unesco é Günther Pitscheider da Santa Cristina.
La fotografia dada jö da Günther Pitscheider é gnüda aratada la plü originala por ilustré la cosciënza dles comunités y di valurs universai dl raiun dles Dolomites sciöche patrimone mondial Unesco. Cun süa foto él rové al pröm post dla competiziun, a chëra che al á tut pert indöt 50 parztezipanc. Pitscheider á insciö ciafé le Pest spezial por le Südtirol “DolomitArt DoloMystic”, scrit fora tl contest dl proiet Dolomitart. L'obietif dla scomenciadia é chël da valorisé la natöra y les comunités de val sciöche les fondamëntes dl raiun dles Dolomites patrimone mondial UNESCO. Le pröm pest é 500 euro. Le pest é gnü surandé en sabeda, ai 4 de novëmber tla Biblioteca Hans Glauber a Toblach, olache les operes fotografiches é ince da odëi. Al secundo post él rové Gabriel Grunser de Toblach, terzo é Walter Hackhofer ince de Toblach. Ti pröms cinch posć él ciamó rové Martin Brugger de San Jöre y Alfred Erardi de Ehrenburg. I atri artisć nominá é Erich Gutweniger de Toblach, Elena Zibler de Frechen (D) y Ulrike Rehmann de Toblach.
Iuria y fin dla scomenciadia
La iuria che á surandé i pesć ê metüda adöm dal fotograf Sepp Hackhofer, dala jornalista Nina Schröder y dal fotograf Fabian Kraler. Aladô dla iuria é la fotografia de Pitscheider n’espresciun singolara dl ert dla fotografia. Ara pê depënta cun la löm. Le fotograf é insciö sté bun da cherié n’atmosfera dër mistica ince por mirit dles tonalités dl corú grisc.
Le pest fotografich DoloMystic fej pert dla scomenciadia Dolomitart, che é n proiet che á le fin da sotligné les particolarités esistenziales, culturales, emozionales y spirituales dl liam danter la porsona y les munts. De conseguënza vëgnel metü da jí de plü scomenciadies por colié la creativité ala sconanza dl ambiënt y ala manira de vita alpina cun n’atenziun particolara al’area dles Dolomites patrimone mondial Unesco. Iniann é les tematiches prinzipales les liëndes y la magia dles munts. Öna dles scomenciadies é stada le concurs fotografich organisé dal Comité por l’istruziun de Toblach adöm cun la biblioteca “Hans Glauber” y le Parch natural Trëi Pizes de Lavarëi.
La mostra sará da odëi cina ai 18 de jená
Les fotografies chirides fora dala iuria sará da odëi cina ai 18 de jená dl 2018 tla Biblioteca Hans Glauber, strada Fratelli Baur 5b,a Toblach. La daurida dla mostra é gnüda acompagnada dala rapresentaziun artistica dla liënda di monns de spidl “Spiegelwelten” cun l’interpretaziun dla storia de Dona Dindia a cura de Heike Vigl. La performance artistica é stada dl grup Mirrow-ra cun Reinhilde Gamper y Manuela Herer.
Por de plü informaziuns sön i dis y i orars de daurida: www.dolomitart.com
USP
Galaria dales fotografies
