Plü ativité fisica tles scores: incuntada cun i esperc dl sport
Al ti é gnü presenté ai operadus dl setur sportif le pachet de mosöres aprové dala Junta provinziala por alzé l'ativité sportiva tles scores.
Stüdi internazionai desmostra che a livel europeich él n trend negatif; tres de plü studënc pesa demassa y á dificoltés por ci che reverda le movimënt: la domanda dl’Organisaziun mondiala dla sanité baia de 90 menüc de movimënt al de, tl Südtirol se möi i jogn mesanamënter 60 menüc. Dl contribut che la scora pó dé por garantí deplü movimënt y de plü ativité fisica di jogn él gnü baié inier a Balsan tl'incuntada cun dozënc, operadus y funzionars tl ciamp sportif, sön invit di assessurs provinziai por la scora todëscia Philipp Achammer y por le sport Martha Stocker. Tl Palaz Widmann él gnü mostré le pachet de mosöres "Plü movimënt y sport" aprové dala Junta provinziala ala fin d’agost y che vëiga danfora l’aumënt dles leziuns d’educaziun fisica tles scores todësces. Al é porchël gnü baié de co fá a na moda che le sport sides plü plajor tl stüde.
La scora é l'unica istituziun che arjunj düc i mituns y dötes les mitans y la jonëza, mo al n’é nia ma la scora che á le compit da contribuí a n svilup dl'ativité sportiva y dl movimënt informal: canche an baia de stii de vita sagns mëss döta la sozieté tó pert, á recordé Achammer y Stocker. Tl'incuntada él gnü baié de aspec problematics desvalis: le valur dles ores d’educaziun fisica tla scora, la formaziun spezifica di dozënc y les lercs adatades tles scores elementares, le mënder interes dles scores devers le sport. Cun l'aiüt di esperc y di funzionars de assoziaziuns y federaziuns sportives án porvé da capí co mioré la situaziun. Por fá a na moda che na scomenciadia sportiva sides sostenibla tl tëmp, él gnü osservé, che ares mëss s’aspane al tëmp lëde: ince geniturs y compagns mëss se dé da fá, al ne tleca nia plü insegnanc o alenadus. Zënza desmentié, sciöche n stüde svizer desmostra, che les ores d’educaziun fisica obligatories tles scores alza le livel di studënc te d’atres materies.
Danter les propostes él chëra da mëte a desposiziun döt le de curts scolastiches, palestres y implanc sportifs dles scores y da mioré la comunicaziun danter federaziuns sportives y scores. "Chësta incuntada é le pröm vare positif de na discusciun importanta", á stlüt jö Achammer. L'assessuria Stocker á anunzié da orëi valuté l'estenjiun dl program "AFIP-ativité fisica sön prescriziun" ince ai doturs di mituns, che gnará inviá ala proscima incuntada sön le tema sanité y movimënt. AFIP é n’indicaziun terapeutica scrita dal dotur de medejina generala por promöie l’ativité fisica.
USP
Galaria dales fotografies
