Ladin a Souramont y insegnamënt plurilingual: dui proiec de valüta
La buna cualité di proiec organisá dal Departimënt Scora y Cultura ladina vëgn confermá dala relaziun anuala dl Sorvisc de valutaziun por la scora ladina.
Analisé la cualité dl insegnamënt tles scores dles localités ladines, organisé les proes PISA y Invalsi y evalué da defora le sistem scolastich ladin: chisc é danter l’ater i obietifs prinzipai dl Sorvisc por l’evaluaziun da defora dles Scores y dles Scolines ladines. Le ressumé dles ativités tratan l’ann de scora 2016/17 é gnü presenté dan da püch dal assessur por la scora ladina Florian Mussner ala Junta provinziala. La relaziun anuala é gnüda realisada dala coordinadëssa dl Sorvisc d’evaluaziun, Rosmarie Mussner che se fistidia ince dl’evaluaziun dles scores elementares y mesanes trates ora a sort. Intratan él gnü stlüt jö cun dötes les scores raionales de Gherdëna y dla Val Badia cun n feedback scialdi interessant y relaziuns cun punc stersc y debli, insciö Mussner. Chësc ann gnarál ince lauré inant sön l’evaluaziun da defora dl Istitut Technich Economich Raetia y dl Istitut Technich Economich de La Ila.
“Al é n program dër ampl cun tröpes ativités de valutaziun de proiec y de scomenciadies. Le sorvisc é dër important deache al confermëia che le sistem scolastich ladin á na cualité d’insegnamënt dër alta, ince tratan i confrunc dles proes Pisa y Invalsi”, insciö l’assessur Mussner. Implü él ince gnü valuté inann dui proiec de gran relevanza por le sistem scolastich ladin, da öna na pert le proiet pilot tl plurilinguism tl insegnamënt de mujiga tles scores y dal’atra pert le proiet interladin de acompagnamënt y sostëgn dla valutaziun dl insegnamënt dl ladin tles scores elementares de Souramont. “La valutaziun positiva dl proiet interladin nes dá ince la motivaziun da jí inant cun chësc proiet de gran valüta por insegné nosta rujeneda dla uma tles scores elementares de Souramont ince tl ann scolastich atual 2017/18”, spliga l’assessur Mussner. L’intendënt Roland Verra é dla minunga che al é dër positif da tigní inant la buna colaboraziun cun les scores da Fodom tl spirit de solidarieté interladina. La presentaziun di resultac dl’evaluaziun gnará spo presentada cun na publicaziun ai responsabls y suranstanc.
Tla scora elementara dl Comun de Fodom vëgnel organisé da plü agn le proiet dal inom „Ladin nte Scola“ finalisé al’adoranza sistematica dl Ladin tl setur scolastich che á consintí da realisé ince mosöres de sostëgn dl lingaz sciöche preodü ince dala lege statala 482/99 en materia de sconanza dles mendranzes linguistiches. Le proiet é gnü a se le dé por merit dla colaboraziun, formalisada tres na Convenziun, danter l’Intendënza ladina da Balsan, l’Istitut Cultural Ladin Cesa de Jan y la Direziun scolastica raionala de Alleghe.
USP
