Presentada la campagna cuntra l’alcol "Degun compromis"
L’assessuria provinziala por la sanité, Martha Stocker, á presenté l’ediziun nöia dla campagna de prevenziun "Degun compromis" cuntra l’alcol.
“Degun compromis – 4 stories sozedüdes davëi”, é le slogan che caraterisëia l’ediziun nöia dla campagna provinziala cuntra l’alcol organisada dal Forum Prevenziun en colaboraziun cun la Repartiziun por la sanité. L’articolaziun dla campagna, che dess porté pro ala reflesciun y sensibilisaziun dl’opiniun publica sön chësc problem tan zite, é gnüda portada dant incö danmisdé (22 de novëmber) tratan na conferënza stampa dal’assessuria provinziala por la sanité, Martha Stocker, dal diretur dl Forum Prevenziun, Peter Koler y dal regist Andreas Pichler.
Aladô di ultimi dac Istat vëgnel registré resultac positifs, cun n arbassamënt dl consum de alcol danter i plü jogn y chësc incorajëia da jí inant de chësc vers caraterisé da n moscedoz de proibiziuns y prevenziun” á dit l’assessuria provinziala por la sanité y les politiches soziales, Martha Stocker, tratan sö intervënt.
L’ediziun nöia dla campagna de prevenziun cuntra l’alcol á sambëgn n profil sterch. Al zënter él cater stories sozedüdes davëi olache i protagonisć cunta sües esperiënzes y baia a na moda critica dl alcol. Ti filmac cunta na jona che sará tosc uma, n sanitar dl sorvisc d’emergënza, na porsona che é cuntra le bëre por convinziun y n per de geniturs che á pordü so möt te n inzidënt sön strada gaujé da n ciafer cioch, sües esperiënzes y proponn na reflesciun concreta sön chësc tema. La rejia di filmac ti é gnüda surandada al documentarist conesciü Andreas Pichler.
La campagna é metüda adöm da na seria de tofles stradales, inserziuns y banner che gnará dant ti media stampá y digitai y tles ferates dl trasport publich provinzial. I cater video é da odëi sön la plata www.zerocompromessi.it realisada aposta.
La campagna mët a desposiziun ciamó d’atri stromënc, sciöche por ejëmpl n autotest sön le consum d’alcol, consëis sön la “Festa responsabla” y n’app nöia por chirí debota y saurí n shuttle por jí a ciasa. La campagna vëgn ampliada cun les tofles stradales che se referësc cun i protagonisć y le slogan “Sce i bëri, ne arvëni nia!” al messaje zentral dla campagna.
Por de plü informaziuns y por desćiarié le material ilustratif dla campagna pón jí sön la plata internet www.zerocompromessi.it y la plata Facebook trinkenmitmass/bereresponsabile.
USP
Galaria dales fotografies
