Cultures y lingac de mendranza: domandes ala Regiun cina de novëmber
Contribuc dla Regiun por valorisé identités culturales y linguistiches dles mendranzes: les domandes de finanziamënt é da dé jö cina i 30 de novëmber.
Valorisé les identités culturales spezifiches: é l’obietif prioritar dles scomenciadies de promoziun y de sconanza dles mendranzes dla Regiun, che sostignará inant scomenciadies y ativités tl ciamp dl aprendimënt linguistich, dl insegnamënt y dla divulgaziun dl lingaz de mendranza y dla realisaziun de stromënc linguistics y material didatich (gramatiches, vocabolars, libri y i.i.). Les domandes de finanziamënt por la realisaziun de scomenciadies dl 2018 messará gní scrites fora sön i formulars arjigná ca dala Regiun y messará gní dades jö tl Ofize por les mendranzes linguistiches dla Regiun a Trënt, tla via Gazzoletti 2, o a Balsan, te plaza Università 3, cina les 16:00 de jöbia, ai 30 de novëmber dl 2017.
Al pó ince gní finanzié intervënc che reverda le ciamp cultural, sciöche ativités d'inrescida storica y che pó daidé recostruí la memoria dles mendranzes linguistiches (divulgaziun dl lingaz y dla cultura de mendranza te dötes sües espresciuns, conservaziun y recuperada dl paesaje y di insediamënc tipics, programs tla televijiun o tl radio dantadöt tl lingaz de mendranza). Por ci che reverda la formaziun alta sostëgn la Regiun proiec de cooperaziun danter universités y ënc por la formaziun alta tl ciamp dl insegnamënt, dla formaziun y dl'inrescida scientifica, manifestaziuns che consolidëia l’identité y la sensaziun de portignënza ala mendranza linguistica y svilupëia l’agregaziun soziala. Al n'é indere nia preodü intervënc de sostëgn por scomenciadies che reverda le setur dl sport.
Les domandes pó ince gní ortiades; al vel la data dl timber dla posta. I formulars é da ciafé tl Ofize por les mendranzes linguistiches o da desćiarié sön le sit dla Regiun www.regione.taa.it/Minoranze/iniziative.aspx
USP
