Dala Junta: eghes minerales, por l’adoranza de majeres tarifes
La Junta provinziala á aprové ai 5 de dezëmber les tarifes nöies por l’adoranza de eghes minerales. Cuotes alzades da 10 a 15 iadi tan.
Les tarifes idriches nöies por l’adoranza de ega minerala é gnüdes aprovades dala Junta provinziala sön proposta dl assessur por l’ambiënt y l’energia Richard Theiner. La proposta é gnüda elaborada dal’Agenzia por l’ambiënt en referimënt al’adoranza de ega minerala sciöche ega da bëre tles bozes, por le termes o por terapies o ince bagns locai. La proposta á bele ciafé l’arat positif dl Consëi di Comuns. Les tarifes nöies jará en forza cun la publicaziun dla deliberaziun sön le Boletin ofizial dla Regiun. Les diretives nöies é gnüdes ajornades porvia dles mudaziuns legislatives sön basa europeica y statala.
“Cun la delibera da incö vëgnel atué la orenté politica da orëi alzé les tarifes por l’adoranza de eghes minerales che ê cina sëgn tla Provinzia de Balsan scialdi basses”, dij l’assessur Richard Theiner che sotlignëia ince che “cun le bëgn publich dl’ega vëgnel fat n cer davagn economich che dess ince gní resplidé por les cuotes dl’adoranza.” Aladô de Theiner se posizionëia sëgn le Südtirol te na posiziun alta, ince sce nia cun i prisc plü alc dla Talia.
Les fontanes de ega minerala presëntes sön le teritore fej pert dl patrimone indespensabl dla Provinzia. La Junta provinziala á reconesciü sciöche eghes minerales les eghes de 32 fontanes. Por l’adoranza de chëstes ressurses él nezesciar da avëi n’autorisaziun aposta y da paié les tarifes fissades dala Junta provinziala.
Les tarifes nöies
Por le eghes minerales destinades al’ega tles bozes sará la cuota idrica anuala nöia che fej referimënt ala conzesciun de 7.500 euro por vigni liter al secund. Da calcolé lapró a chësta cuota él ince la cuota tarifara anuala por la derivaziun dl ann da denant (0,40 euro por vigni meter cubich d’ega) y chëra por l’ega tles bozes tl ann da denant (2 euro por vigni meter cubich d’ega). Aladô sce al é gnü adoré bozes de spidl da sciuré demez él da paié 2,30 euro, sce les bozes é de n ater material da sciuré demez spo 2,70 euro.
La cuota nöia dla tarifa por l’adoranza de eghes minerales por fins termai o de terapies sará l’import de conzesciun de 1.250 euro por vigni liter al secunt (cina sëgn ê la cuota a 355,60 euro). A chësta cuota mëssel ciamó gní ajunté lapró la tarifa anuala por vigni meter cubich de ega derivada dal ann da denant de 0,03 euro.
Por l’adoranza de eghes minerales por atri fins nia de terapia, sciöche por ejëmpl por i bagns locai, mëssel gní paié na cuota de 200 euro al’ann por vigni liter al secunt de adoranza dl’ega en conzesciun. Implü él ince chiló da paié lapró la tarifa anuala por vigni meter cubich de ega derivada dal ann da denant de 0,02 euro.
USP
