Dala Junta: vazinaziuns y cures paliatives
La Junta á stabilí le percurs por verifiché la documentaziun dles vazinaziuns. Löm vërda por n zënter nü de cures paliatives.
Dal mëteman dl ann scolastich nü él jü en forza tla Talia la normativa nöia sön les vazinaziuns. Por vigni möt o möta mëssel gní documenté 10 vazinaziuns por che al sides poscibl da se scrí ite tles scolines y istituziuns pedagogiches, sides publiches co privates. Söporjö 400 families dl Südtirol ne á cina sëgn no presenté la documentaziun nezesciara no l’autodetlaraziun tles scores. Te süa sentada da incö á la Junta provinziala stabilí cai che sará i proscims vari por evité na esclujiun de n möt o na möta tles scolines o pro d’atri sorvisc sciöche les umes dl de. La proposta é gnüda fata dal’Aziënda sanitara.
Düc i mituns, a chi che al ti mancia öna o de plü vazinaziuns, ciafará ai pröms de jená n invit da pert dl’Aziënda sanitara da fá chëstes vazinaziuns. Sce i geniturs ne respogn nia a chësta esigënza ti gnarál mené de merz n invit a n’incuntada de consulënza che dess porté ala vazinaziun.
Chi che ne se presentará gnanca a chësta incuntada ciafará da ma dl 2018 inant n protocol da pert dl’Aziënda sanitara cun n termo de 60 dis por fá la vazinaziun. Da messé inant gnará spo i mituns che ne á nia fat les vazinaziuns segnalá al Ofize Prevenziun, Promoziun dla sanité y sanité publica dla Provinzia. Chësc ofize ti fajará spo na straufunga ai geniturs y i mituns dai 0 ai 6 agn gnará segnalá ala direziun dla scolina o dles atres assoziaziuns de suraverda de mituns. “L’obietif prinzipal dles incuntades sará chël da informé i geniturs y da alzé insciö le numer dles vazinaziuns – á dit l’assessuria Martha Stocker – ma sce al se alza le numer de porsones vazinades spo sarál meso da sconé ince i mituns che por gaujies de sanité ne pó nia efetué la terapia dles vazinaziuns. I sun sigüda che te chësta manira sarál poscibl da smendrí i dübi y da arjunje les porsones te na manira autonoma.”
Por ci che reverda les iscriziuns ales scores dal ann scolastich 2018/19 inant sarál l’Aziënda sanitara che fajará le control dla situaziun dles vazinaziuns di mituns y dles mitans che rovará tla pröma classa elementara. I dac ciafarái dales listes dles scolines y dles atres istituziuns. L’Aziënda sanitara fajará i controi cina ai 10 de jügn dl 2018. Cina ai 10 de messé sarál spo les istituziuns scolastiches che podará damané la documentaziun dles vazinaziuns ai geniturs di mituns a chi che al ti mancia vazinaziuns. Sce la documentaziun ne gnará nia presentada sarál i mituns che podará gní stlüc fora dal’istituziun.
La Junta provinziala á ince aprové la program planivolumetrich de na strotöra nöia por cures paliatives por mëndri tla zona de Balsan. L’area mëss ciamó gní ciafada, i investimënc sará de söporjö 5,2 miliuns de euro, mo por l’assessuria Stocker podarál ince gní tut en conscidraziun da adoré strotöres bele esistëntes. Le plann prevëiga la creaziun de cinch apartamënc por i paziënc y sües families, y implü ince locai por la fisioterapia, la psicoterapia, palestres y locai por la meditaziun.
USP
