Dala Junta: les dezijiuns prinzipales
De plü controi söi mesi dl trasport publich y n’acordanza cun les forzes militares sön la revalutaziun de arees militares é stades döes tematiches prinzipales.
N punt prinzipal sotrissé incö tratan la conferënza stampa dla Junta provinziala é sté chël dla segurëza sön i mesi dl trasport publich. “Viajé zënza na chërta varënta y ne savëi nia da se comporté é döes cosses che ne vëgn nia azetades sön i mesi dl trasport”, á splighé Kompatscher presentan ince la posiziun dla Junta. “Por aumenté la segurëza unse ciafé n’acordanza adöm al Comissariat dl Govern y ala Cuestöra che á dit da orëi ince alzé le numer dl personal de segurëza”, á dit Kompatscher.
En acordanza cun i conzescionars dessel sëgn gní stabilí sön ci trasses y te ci ores che al dess gní controlé deplü y tan di che al gnará controlé plü avisa. Por ci che reverda le finanziamënt él bele preodü n capitul de spëisa ti contrac de sorvisc cun i conzescionars. “Tan tröp che al gnará ciamó investí sará ciamó da ejaminé ince conscidran tan inant che i controi jará”, á dit Kompatscher.
I mesi dl trasport publich tl Südtirol vëgn tres plü adorá. Chësc vëgn ince desmostré dales zifres: dantadöt tl setur dles ferates él le numer di passajiers che s’á alzé cotan ti ultims diesc agn. Sön la trassa dla Val de Puster s’á le numer di passajiers tripliché. Dl 2013 êl ciamó 49,2 miliuns de timbradöres al ann cun 8,6 miliuns sön les ferates. Tl 2016 é le numer sté de 53,3 miliuns de timbradöres, de chëstes 8,6 miliuns sön les ferates. “Ince iniann él indô gnü registré n ampliamënt dles porzentuales por ci che reverda les linies dla Val d’Isarch, la Val de Puster y la linia che porta a Maran”, á dit le presidënt dla Provinzia Arno Kompatscher. De conseguënza él ince les entrades che s’á alzé. Dl 2011 êl ciamó gnü registré 24,1 miliuns de euro de entrada dal’adoranza di mesi publics, tl 2016 esun rová a 40,18 miliuns de euro cun tl 2015 ince na reforma dles tarifes, sciöche l’assessur por la mobilité Florian Mussner á alzé fora.
N vare inant ince por ci che reverda l’intenüda firmada danter le Minister dla Defenüda y la Provinzia por la revalutaziun de n valgönes infrastrotöres adorades dales forzes armades tl Südtirol y dl passaje de n valgügn raiuns militars nia plü adorá por fins istituzionai. L’acordanza prevëiga le passaje de arees militares nia plü adorades dal Stat ala Provinzia. Sciöche retüda él la Provinzia che finanziará na seria de laurs de manutenziun de frabicac di soldas. Le valur complessif dl’operaziun é de söporjö 220 miliuns de euro.
Incö él la Junta che á autorisé le Presidënt da firmé le contrat da 27 miliuns de euro danter la Provinzia y l’Agenzia dl demane. Le contrat reverda le passaje de proprieté ala Provinzia dla caserma Verdona a Vahrn (operaziun da 15,5 miliuns de euro) y dl areal dlungia (valur de 2,4 miliuns de euro), sciöche ince de na pert dles frabiches tl raiun dla caserma Schenoni a Porsenú por zirca 9 miliuns de euro. “Chësta acordanza é dër inovativa, deache insciö sarál poscibl da mëte a despsoiziun arees por realisé operes publiches o proiec de valüta adöm ai Comuns y ala popolaziun”, á sotligné le preisdënt Kompatscher.
USP
