Kompatscher söl bilanz aprové: garantí sigurté y stabilité
Löm vërda por i trëi dessëgns de lege che reverda le bilanz dl 2018: garantí sigurté y stabilité por bilanz y programaziun, sotlignëia le presidënt Kompatscher.
Cun l’aprovaziun di trëi dessëgns de lege che reverda la lege finanziara, la lege dla stabilité y le bilanz de previjiun á le Consëi provinzial dé jö n arat positif al bilanz 2018 planifiché dala Junta provinziala. Le bilanz é de söporjö 5,98 miliarg de euro, la cuota da dé fora é de söporjö 5 miliarg. “I un porvé da avalié le bilanz a na manira da ti conzede a n numer plü gran de porsones da tó pert al svilup de nosc teritore”, comentëia le presidënt dla Provinzia Arno Kompatscher do l’aprovaziun. Pité stabilité y sigurté é dui obietifs fondamentai por la Junta provinziala che ó concretisé chisc obietifs tres n renforzamënt dles competënzes dl’autonomia y cun na rëi costanta de bëgnester, insciö Kompatscher. D’atres mosöres che contribuësc al’identificaziun dla popolaziun cun la tera te chëra che ara vir é la sconanza dl paesaje y la creziun de condiziuns mius por svilupé l’economia y l’ocupaziun.
Ince por le proscim ann gnará plü dl mez dl bilanz investí ti seturs dla sanité, dla formaziun, dl welfare y dles families. Le percurs da diminuí les cutes vá inant ince tl 2018: la Provinzia á preodü alisiraziuns fiscales por indöt 315 miliuns de euro. Mosöres che confermëia che tl Südtirol él la ciaria fiscala plü bassa de döta la Talia. N’atenziun particolara ti gnará dada tl 2018 ince al sostëgn ai Comuns cun plü autonomia y responsabilité. “Cun l’aprovaziun dl bilanz provinzial 2018 podunse jí inant sön la strada dl autoguern responsabl cun intervënc de sostenibilité soziala, economica y ecologica. Chësta strategia nes conzed da mantigní sorvisc de cualité por le bëgnester dla popolaziun y dl svilup dl Südtirol mantignin la richëza culturala desfarënta”, insciö Kompatscher.
USP
