Analisa y trascriziun dl Archif Quellmalz - presentaziun a San Martin
La publicaziun nöia reverda la racoiüda de registraziuns ladines dl archif de Alfred Quellmalz di agn 1940-41 cun lapró n comentar scientifich.
Por le pröm iade él dötes les registraziuns ladines dla racoiüda dl inrescidú musical todësch Alfred Quellmalz gnüdes publicates te n liber cun lapró n comentar scientifich: le gran laur de inrescida y de documentaziun dla situaziun dla musiga popolara tl Südtirol al scomenciamënt di agn ’40 é gnü presenté al publich ai 20 de jené a San Martin de Tor tl Istitut ladin “Micurá de Rü”. Le liber dal titul "Les registraziuns ladines tla racoiüda de Alfred Quellmalz (1940-1941). Ressonns de na cultura minoritara tl tëmp dl nazifascism tl Sudtirol" é n volum trilingual cun CD por ladin, todësch y talian. Alfred Quellmalz (1899-1979) á tut sö ti agn 1940 - 41, tratan la perioda dl Option tl Südtirol, indöt 700 registraziuns cun stromënc y 1700 cianties sön vëta.
Cun chësta publicaziun vëgnel implí na locia tla bibliografia etnomusicologica ti raiuns todësc y ladins. La publicaziun se dá jö prinzipalmënter cun la domanda sön co che l’inrescida scientifica dess gní valutada sce ara é gnüda realisada sot a n sistem totalitar. Pro les registraziuns de Alfred Quellmalz ne se tratel insciö nia de na racoiüda ogetiva, deache les ditatöres s’á anuzé tl tëmp passé dla cultura popolara por fins de propoganda politica. Chësc vëgn ince sotligné tl’introduziun dl liber. Le liber contëgn les registraziuns de dötes les 173 cianties dla Val Badia y de Gherdëna cun lapró fotografies y anotaziuns da diars dl'epoca y dossiers.
Manuela Cristofoletti dla Seziun Musiga popolara á podü saludé tröpes porsones interessades ala presentaziun dl liber, danter chëstes êl ince la presidënta dl Istitut Micurá de Rü Erika Castlunger, le diretur dla Scora de Musiga dla Val Badia Raimund Pitscheider, le degan dla Facolté de Sciënzes dla Formaziun Paul Videsott y Günther Quellmalz, le möt dl inrescidú Alfred Quellmalz, che é gnü aposta dal Canada.
I dui editurs Barbara Kostner y Paolo Vinati á presenté cun Thomas Nußbaumer (Mozarteum da Desproch) y Florin Pallhuber (Seziun Musiga popolara) le liber y sü contignüs. Dla cornisc musicala s’á cruzié n grup de musizisć y ciantarines incër Paul y Hilda Schuen.
Le liber é gnü publiché ti trëi lingac dla provinzia y s’adressëia sides al publich spezialisé che ala jënt interessada ala cultura, pitan insciö a düc i grups linguistics n contribut important por l'analisa de n tëmp storich dër ri y contesté. Al é gnü realisé sön inciaria dla direziun de Scores de musiga ladines y todësces dala ciasa edituria grafo. Le liber sará da ciafé te botëghes de libri chirides fora, sciöche ince tla botëga online dl editur sot www.grafo.it
USP
Galaria dales fotografies
