Dala Junta: agricoltöra soziala, löm vërda al dessëgn de lege
Le dessëgn de lege sön l’agricoltöra soziala é gnü aprové. Sostëgn ai operadus che se fistidëia dl inserimënt tl marcé dl laur y dles terapies de reabilitaziun.
La tematica dles politiches soziales metüda en pratica ince tl setur dl agricoltöra ne é nia daldöt nöia: bele dan da 10 agn él gnü a se le dé les prömes scomenciadies liades al’assistënza sides al’infanzia co ince ai seniors. “Cun le tëmp él les esigënzes che s’á mudé, sides por ci che reverda les ativités co ince le setur en general, y porchël él gnü elaboré n dessëgn de lege nü cun na cornisc iuridica y legislativa che pois ti garantí segurëza ai operadus y la cualité di sorvisc”, spliga le presidënt dla Junta Arno Kompatscher. En colaboraziun cun la Lia di Paurs, les scores provinziales de economia da ciasa y l’Eurac él sté les Repartiziuns Agricoltöra y Politiches soziales dla Provinzia che á lauré fora n dessëgn de lege nü. La proposta, presentada dal assessur Arnold SChuler, é gnüda aprovada incö dala Junta provinziala. L’obietif dla lege é chël da promöie l’agricoltöra soziala y la poscibilité por i paurs da sté tles zones rurales cun sües ativités. D’atres priorités é ince la promoziun dla multifunzionalité de döta l’agricoltöra te sües formes plü desvalies.
N punt de fora dla lege sará les aziëndes agricoles a conduziun familiara. “Cun l’obietif da ester na proposta alternativa al’oferta bele presënta y degöna concorënza”, spliga Kompatscher. Cun le dessëgn de lege nü dessel gní cherié na lista provinziala de operadus dl’agricoltöra soziala che conscidrëia chi che se fistidëia dl inserimënt tl marcé dl laur, de prestaziuns y ativités soziales y de sorvisc por les comunités locales, prestaziuns y sorvisc por l’adoranza de plantes, proiec de educaziun ambientala y alimentara, sconanza dla biodiversité y ampliamënt dles conescënzes söl teritore.
Chësc reverda te na forma concreta por ejëmpl le sorvisc dles umes dl de, dl’assistënza ales porsones cun handicap y ai seniors, sciöche ince le sorvisc dl porté le mangé tles ciases a porsones cun dificoltés y scomenciadies liades ala cura y reabilitaziun, sciöche por ejëmpl la pet-therapy.
Le sostëgn dla Provinzia reverda contribuc por investimënc y intervënc de adatamënt dles stotöres, partezipaziun ai cosć dles tarifes orares di sorvisc d’assistënza, contribuc ai cursc de fomraziun, ativités de sensibilisaziun y d’atres scomenciadies. Dötes les scomenciadies y i sorvisc gnará coordiná dala consulta provinziala por l’agricoltöra soziala.
USP
