E-mobility efiziënta y adatada ince por les aziëndes
La Junta provinziala á incö aprové de plü mosöres de promoziun dla mobilité eletrica. Poscibilité de proes por aziëndes y mudaziun di contribuc.
Da plan, nec y al’altëza di bojëgns aziendai. Les impreses dl Südtirol gnará tosc inviades a odëi ite diretamënter chisc y d’atri vantaji di veicui eletrics. La Junta provinziala á incö, ai 30 de jená aprové le scomenciamënt de n proiet che reverda la proa de sorts desvalies de veicui eletrics ponsá propi por les aziëndes dl Südtirol.
“Cun l’obietif da mëte l’atenziun indô sön la mobilité eletrica orunse pité l’ocajiun a tröpes aziëndes da porvé fora la mobilité dl dagní” dij le presidënt dla Provinzia Arno Kompatscher, che recorda i sostëgns provinziai por cumpré i veicui eletrics. La Ciamena dl Comerz y les organisaziuns economiches gnará tute ite tl proiet.
“Sce an cumpra veicui eletrics da degönes emisciuns, pita dantadöt les aziëndes n contribut important por n ambiënt net y na miú cualité dla vita” dij l’assessur provinzial por l’ambiënt Richard Theiner. Le proiet che á ciafé l’ok dla Junta prevëiga da ti mëte a desposiziun debann ales aziëndes dl Südtirol zirca 20 veicui eletrics de de plü ciases produturies y de sorts desvalies, da porvé fora por de plü dis.
Na te scomenciadia ti é bele gnüda proponüda ai zitadins privac cun le Roadshow, che condüj, sot la regia dla Repartiziun Mobilité dla Provinzia, ti maius zëntri dl raiun provinzial i veicui inovatifs y moderns ti conzedon ai zitadins da i porvé fora. Le sostëgn por la cumpra di veicui eletrics fej pert dles mosöres por la mobilité sostenibla sot les tematiches #greenmobilitybz y #viaggiaresmart. L’implementaziun dles scomenciadies desvalies vëgn fata por mirit dl’aziun sinergica di departimënc provinziai economia, ambiënt y energia, mobilité y rëi stradala.
Implü á la Junta provinziala ince aprové incö mudaziuns al sistem de contribuc por la cumpra de veicui eletrics por ci che reverda les scores dai auti y i sorvisc di taxi. Por chëstes döes categories sará le contribut por la cumpra de n veicul eletrich dopl tan alta co cina sëgn. De 6.000 (4.000 dala Provinzia y 2.000 dal’aziënda de venüda) sará le contribut por la cumpra de n veicul eletrich y de 3.000 euro (2.000 euro dala Provinzia y 1.000 dal’aziënda de venüda) pro la cumpra de n veicul “hybrid plug-in”. Implü él ince preodü por les aziëndes contribuc por la cumpra de rodes eletriches “cargo”. Domandes do contribuc pó gní dades jö döt l’ann pro i ofizi provinziai dla Repartiziun Economica, strada Raiffeisen 5 a Balsan.
facebook: Green mobility Südtirol – Alto Adige
instagram: green.mobility
YouTube: #greenmobilitybz
USP
