Lites: apel da jí a lité de Kompatscher, resultac sön le web
En domënia les lites por renové le Parlamënt. Apel da jí a lité cun video dl presidënt dal Provinzia Kompatscher, resultac locai sön le sit www.elezioni.bz.it.
I zitadins y les zitadines dl Südtirol vëgn cherdá a dé jö süa usc en domënia, ai 4 de merz por les lites politiches. Le presidënt dla Provinzia Arno Kompatscher, inviëia düc a jí a lité por eserzité n so dërt fondamental tres n video sön le canal youtube dla Provinzia (cun traduziun por ladin). "Vigni usc é importanta- spliga Kompatscher – ajache la democrazia se basëia sön la partezipaziun di zitadins. Ne jí nia a lité ne pó nia ester n’alternativa". Le presidënt dla Provinzia de Balsan sotrissëia che "la Provinzia de Balsan á debojëgn de na rapresentanza sterscia a Roma, che sostëgnes nosc percurs autonomistich. Al é che che lita che fej fora a che ti surandé chësc rode; ne lité nia ó dí lascé che i atri toles na dezijiun sön so dagní". Te so apel da jí a lité dij Arno Kompatscher che "vigni zitadin y vigni zitadina dess tó na dezijiun lediamënter y cun cosciënza sön i candidac plü adatá. Na gran partezipaziun ales lites – stlüj jö le presidënt dla Provinzia – ti conzedará ai parlamentars litá da avëi na majera legitimaziun popolara".
Por ci che reverda les lites en domënia, ai 4 de merz, sará i dac locai sön tanc che é jüs a lité y le resultat final dles lites da odëi sön le portal www.elezioni.bz.it, realisé dal'Informatica Alto Adige. I dac parziai sará a desposiziun sön le sit dl Ministere dl intern sot dait.interno.gov.it/elezioni, deperpo che por ci che reverda la poscibilité da fá confrunc cun les lites da denant é i dac dl 2013 da ciafé sön la Rëi zivica. Chiló ciafëise le video da desćiarié te na ressoluziun alta: apel da jí a lité.
USP
