Scora ladina: Prozedöra de nomina dl intendënt nü/dla intendënta nöia
Deache l’intendënt Verra vá d'agost en ponsiun él la seziun ladina dl Consëi scolastich che á definí la prozedöra de nomina. An pó se candidé cina ai 6 d’aurí.
Cun la fin d’agost él l’Intendënt dles scores ladines, Roland Verra che vá en ponsiun. Verra é a ce dl’Intendënza ladina dal 1992 inant. “Porchël él nezesciar da scomencé sëgn cun la prozedöra de nomina dl Intendënt nü/dla Intendënta nöia sciöche preodü dal Statut d’Autonomia”, dij l’assessur por la scora ladina Florian Mussner.
Por che l’inciaria pois gní curida da setëmber inant él gnü scomencé cun l’iter che porta ala nomina dl’intendënt/dla intendënta nöia. Tla sentada di 12 de merz dl 2018 á la seziun ladina dl Consëi scolastich provinzial definí la prozedöra por la nomina dl intendënt/dla intendënta por les scores ladines dal 1. de setëmber inant aladô dles normes varëntes.
La prozedöra preodüda dal art. 19 dl Statut de autonomia cun integraziuns tl D.P.R 89/83 vëiga danfora na nomina fora de na terna proponüda dala seziun ladina dl Consëi scolastich provinzial.
La prozedöra plü menüda concordada da chësc gremium tla sentada di 12 de merz dl 2018 vëiga danfora la poscibilité de fá domandes de candidatöra da pert dles porsones interessades cun i recuisic damaná cina al plü tert ai 6 d’aurí dl 2018 dales 12:00 ala misciun e-mail dl secretariat dl Consëi scolastich provinzial carla.pedevilla@provinz.bz.it o gní dades jö tl secretariat dal repartiziun Scora y cultura ladina tla strada Binder 29 a Balsan. Ala domanda ti mëssel gní injunté n curriculum dla vita profescionala.
Aladô dla norma de atuaziun D.P.R. 89/1983 cun sües integraziuns á dirigënc y dirigëntes dla aministraziun zentrala dla istruziun publica y dla aministraziun periferica cun cualifica dirigenziala, dirigënc y dirigëntes dla aministraziun scolastica provinziala cun 5 agn de laur dirigenzial, personal dozënt universitar de rode, ispeturies/ispeturs, direturies/direturs y insegnantes/insegnanc cun 5 agn de rode cun laurea i recuisic por chësta nomina. Ara mëss se traté de porsones de lingaz dla uma ladin. Tla domanda él da dé dant la cualifica profescionala, la laurea, le lingaz dla uma y la detlaraziun da avëi l’ejam de bi- y trilinguism dl livel A. Implü él da injunté n curriculum dla vita profescionala.
Düc i componënc dla seziun ladina podará ince fá propostes de porsones adatades a curí chësta inciaria. La seziun ladina se abinará ai 9 d’aurí por verifiché i recuisic dles candidates y di candidac. Te na reuniun preodüda ai 26 d’aurí gnarál spo invié ite les candidates y i candidac da se presenté y porté dant sües vijiuns. Le dovëi dla seziun ladina dl Consëi scolastich provinzial é chëra da lité y ti propone 3 porsones ala Junta provinziala che chiriará fora danter chëstes la porsona plü adatada por curí chësta inciaria, do avëi aldí le Minister dla Istruziun a Roma. La Junta provinziala nominará spo plü dessigü l’Intendënt nü/l’Intendënta nöia tl mëis de ma che metará man süa inciaria nöia al 1 de setëmber dl 2018.
USP
